Read Southern Rengma Naga LÜHIN 103 Bible Online

LÜHIN 103 - Southern Rengma Naga bible

LÜHIN 103

¹Npugü shwenlo, O a kapu! Lo akeyhun aphu a-zan kenshün shwenlo!

²Npugü shwenlo, O a kapu, lo a-kegwatsü aphu nmhin lanya.

³A-le a kemu aphu jüshü, lo a kethyü kenyü aphu thyü ngwa shü.

⁴Sika günyu a keyhun ntsenshü lo sozin kehü lo shwikenjün jochü pe a tsü shü.

⁵Ale rhün kebin then tha kegwa pe akesü thyü shüo, a selo thyü keshün pe logi hontse shü kehü gü.

⁶Npugü le mele nshwe kehünyu no pen hü lo anyugun kenjü pe tsühü.

⁷A-le a-tson dan pe Mosa hishü, lo a-tho dan pe Israel temi dan no shalo.

⁸Npugü le me shwinjün lo me so sahü, a-nyunta whütse hümvu lo sozin kehü pe a-süpfü.

⁹A-le a-zintse me kesü, nmvue kethonthen anyunnta bin loho.

¹⁰A-le n gun kemu chün hontse shaja pe ntsü hümvu, nmvue nkezü kemu hontse kethun ni hümvu.

¹¹Kechamvule tsang le kazü nyeki tetso kethyü hontse, a nshvu kehünyu sozin kehü tsüle gon ritsin.

¹²Npho le nkhün zen nithen kethyü hontse, a-le ngun thyü kezü dan khipe nzen nithen la hü.

¹³A-pvü le a-nyenyu shwinjün kehü hontse Npugü le a-nshvu kehü nyu shwinjün hünyo.

¹⁴Nyupe n gun thyüyo a-le shabin nyo; n gun le nnyo kenphü tse a-le rüchün kehü genyu.

¹⁵Temi hi we, a-keyhun le tehen hontse; lonyü nye le pun kebin hontse gwünzin;

¹⁶tsangkenbu le whün shü, lo tsüle nrhi lao a-kebin bin shamvu lahü.

¹⁷Ai Npugü keso le kethonthen binti, senyu le a-nshvu hüyo tsünyu ge bin ti, lo a-kemitsin le anyugun nyenyu dan nyenyu ge-e bin ti

¹⁸senyu le a-kejozenkelo gü zen hü lo a-johokeshü dan rüchün-o thyüzen hüyo.

¹⁹Npugü le tsangge a-rajakhün pensolo laso; a-le aphu so raja thyü bin.

²⁰Npugü shwenlo, O hagun tsanggelonyu, a-jothyüzen kehü hagun kekvunyu, a-khwen a-jo nyü kehünyu dan.

²¹Npugü shwenlo, tsanggen kekvu dan aphu, a-kenda thyü kehü a-gonyu dan!

²²Npugü shwenlo, a-le nyhun keshü a-keda hensin kebin aphu. Npugü shwenlo, O a kapu!