Read Southern Rengma Naga LÜHIN 104 Bible Online

LÜHIN 104 - Southern Rengma Naga bible

LÜHIN 104

¹Npugü shwenlo, O a kapu! O Npugü Sunggigü, nle gonri le! Nle terün lo zankechwi pe n jepfü;

²nle keben pe n jepfü hü. Nle tsang dan tsüpe phika nme sükhun keshü hontse shü,

³nle zü so ge n ka thyü. Nmhu dan pe n kerugari thyü tsangkenbu sekin ge tin hü.

⁴Nle tsangkenbu pe nlilo thyü mah lo mahyi pe a-lotho dan thyü kehü gü.

⁵Nle kazü gü pe a-binjwe so ge shüshü, tsüno thame kae nnu la mvu nrün genyu.

⁶Nle züda pe phi nme hontse tsü je laso; zü gü le kazüthun da hen la.

⁷Nle anyugun rhokeshü ka anyugun le tin la; n tsang kesen khwenyü kelo ka anyugun le kehü tin laso.

⁸Anyugun le kazüthun dan so tsun sen-o ketejon dan ki nsheo nle anyugun genyu nda kenjü bin ki gü laso.

⁹Nle anyugun no nken chwimvu nrün terhi nme thyü laso, tson-o anyugun no kazü gü hen nimvu nrün genyu.

¹⁰Nle kazü ketejon dan ka zü no penchwiryü; lo züri dan no rincho ja nyu tsun bin hünyo.

¹¹Tsüdan le lownyu tehen thyü aphu no tsü kelo khishü; tehen nyu kehü gada dan no a-keteri thyülo hü.

¹²Tegü dan le a-temhun senbin ge a-seü thyüo khun bin hü.

¹³Nle tsangge tsangri pe kazüthun ntsenshü; lo njochü le kazü gü kesü kela thyü bin.

¹⁴Senru dan genyu nle tehen no yhunlo lo kazü günyu temi chvü no chwiryü lo nrün genyu tehen dan le chwiryüo a-no low tsülo,

¹⁵lo temi nyun thyüpe no a-kenyülo nrün genyu vain zu, lo a-mhun no ben lo nrün genyu terzü lo a-no nkolo nrün genyu chvüpe temi tsüshü.

¹⁶Npugü senbin dan le züle kesü thyü ntsen bin hünyo, a-le sen keshü Lebanon ge sedar bin dan tsüle.

¹⁷Tsüge tegü dan le a-seü thyü hü; gürhon le fir senbin gen aseü thyü hü.

¹⁸Kazüthun ketetso dan tsüle thyünyu dan genyu, tsonye dan tsüle tsüdan kensen bin.

¹⁹Nle sheh thyüpe no gwünkho dan thyü kekha shü; yhüko le a-keche gwünkho sha bin nyo.

²⁰Nle kezün thyüshü, lo tsüle khejenyu, tsüki chün nyu tehenthyü aphu npfü chwiryü hü.

²¹Shünyho bwe dan le thyütün titse nho hü, Sunggigü le khikeshü a-chvü fü hünyo.

²²Yhüko le chwikeryüka, anyugun le rani gü a-künyu zhü tin lahü.

²³Tsüsiki temi le a-tho nyu güo thathyü bin hünyo.

²⁴O Npugü, n tho dan le ditsüki chon la! Thakesha nyu nle tsü aphu thyüshü! Nle thyü keshü nyukhu dan le kazü gü kesü thyü bin.

²⁵Tsüki züda gü le bin, gon lo nmhun, tsünyu nyukhu swülobu keho le bin, keshe keda aphu.

²⁶Run dan le tsünyu gü hü, lo tsünyu kecho hü lotse nle rhen keshü gü Leviathan le tsünyu bin hü.

²⁷Hidan hi aphu n nri bin hü nyo, n no gwünkho ka anyugun chvü pe anyutsü nrün genyu.

²⁸Nle pe anyugun tsü keshü ka anyugun le tyühü; nle anyugun chvü pe tsüo ketegvü lo hü.

²⁹Nle kebu tin lalo, anyugun le shese lahü; nle anyugun teshe sen tinla lo anyugun le silao nnyo kenphü nyu rani gü lahü.

³⁰Nle nteshe khi keshü ka, anyugun nyhunlo; lo nle keyhun keshün pe kazü gü tsü.

³¹Npugü zankechwi no kethonthen bin kelo gü thyülo! Npugü no a-tha dan nyu a-sherhün kelo gü thyülo!

³²A-le kazü gü nrishü lo ndün la; kazüthun gü kesü shü lo khu chwiryüla hü.

³³Ale rhün kebin then lüthyü pe Npugü ki shüti; ale yhun kebin ka lüthyü pe a Sunggigü shwenti.

³⁴A lükethyü no a-kenyü lo nda, ale Npugü nyu akenyü kehü genyu.

³⁵Kazü günyu kemunyu nkela lo, lo serikemvu no bin sin nyalo. Npugü shwenlo, O a kapu! Npugü shwenlo!