Read Southern Rengma Naga LÜHIN 105 Bible Online

LÜHIN 105 - Southern Rengma Naga bible

LÜHIN 105

¹O chenkeno pe Npugü tsülo, a-keda rüla zolo; temi danyu a-thadan pe meno shalo.

²Lüthyü pe Npugü ki shülo; lüthyü a-shwelo, a-tho ndunkethyü tsü aphu pe zoshülo.

³A-zan kenshün nyu zankechwi thyülo; senyu le Npugü fü hünyo tsünyu no a-sherhünlo.

⁴Npugü, lo a kekvu fülo, a-rüshvu zin hülo.

⁵A-le thyü keshü ndun kethyü tho dan, lo a-le mejün kera keshü dan tsü rüchün hülo;

⁶O a-gogü Abraham nyenyu dan, Jakob nyenyu a-le kejülo kela dan.

⁷A-le Npugü n gun Sunggigü le; a-johokeshü dan le kazü aphu genyu.

⁸A-le kethonthen a-kejonzen rüchün zin bin hünyo a-johokeshü jo gü tsüle shenhe yie genyu.

⁹Abraham zen-o a-le kejozenkelo gü, a-le Isak ka swen-o a-jo hoshü.

¹⁰Tsüpe tejvü hontse a-le Jakob ka tsü zo ketse nishü, Israel genyu kethonthen kejozenkelo nme.

¹¹A-le, “Nno nhon thyüo gwen nrün genyu ale Kanaan kazü khipe ntsü ti.” tson zoshü.

¹²Anyugun temi le kerho thyüo Kanaan kazü nyu tesin thyü kehü ka.

¹³Anyugun le tsipwen nme ka hüo kechaki gü, raja kazü nme nyu hüo temi kecha ki gü.

¹⁴Ai Sunggigü le temi nme-e no anyugun nshwe lamvu; a-le anyugun genyu raja dan rhola:

¹⁵A-le, “Ale kejülo kela gonyu dan kesü nya; a sidyükesha dan nthyü nnyü nya.”

¹⁶A-le chenda nipe kazü günyu shüo anyugun ketyü ketsü aphu khisen tin kela ka.

¹⁷A-le anyugun mhundyü temi nme nishü, Josef, pe do nme hontseo jwe shü.

¹⁸Tegiron pe a-pha phin, lo tegi pe a-gunda khenshü,

¹⁹a-le nyu zoshüyo tsü thyüpenlo kemvuthen. Npugü jo güle a-kegwakeshvu keseü shü.

²⁰Ijipt raja güle meni shüo no a-hoshüla; temi dan ketsen kehü güle a-hoshü la.

²¹Tson-o a-khipe raja kanyu npu thyüshü lo raja gü hon aphu so keda gü thyü shüla,

²²a-kenda thyüo raja hensin kedanyu dan sen zhü shü lo thakesha pe pülü dan senthyü nrün genyu.

²³Tsontse-o Israel le Ijipt ki tsü la lo Jakob le tesin thyüo Ham kazü nyu tesin thyü tinla.

²⁴Lo Npugü le a-temi thyü pe no chon sala lo anyugun thyüpe anyu kenrhinyu nyeki kvula.

²⁵A-le Ijipt nyu nyun thyüpe no a-temi dan shwi ntsü la tson-o no a-gonyu dan sao zen kengü sola.

²⁶Tsüselo a-le a-go gü Mosa lo Aaron, a-le kejü kelo hvu nishü.

²⁷Au le Ham kazü günyu anyugun dan nyu tha zansü lo ndun tho dan thyü shü.

²⁸A-le kezün nishü, tson-o kazü gü thyüpe zün la; ai Ijipt nyu le a-jo dan zen mvula.

²⁹A-le anyugun kazü nyu zü no tezi ngwala, lo anyugun tsehü no sila.

³⁰Tsegu no anyugun kazü kesü thyü, lo anyugun raja kanyu-e.

³¹Sunggigü le zoshü, lo tsüka tekhvü temhu danda le ryü anyugun kazü aphu nyu kesü thyüla.

³²A-le tsangkenri sunka tegwün lo tsangpera tsangkekechwe pe anyugun kazü nyu shü.

³³A-le anyugun vainsha lo kherobin dan nkela lo anyugun senbin dan bosere la.

³⁴A-le zoshü, tsontsin tsekhvü le ryü, tsekhvü dan tsüle swülo bu keho le;

³⁵anyugun kazü nyu henkon henyü aphu tyüla lo anyugun rasha aphu tyü bula.

³⁶A-le Ijipt nyu kami aphu ka peche nyuri gü tsü dushvu küla.

³⁷Tsüselo Israel nyu dan no raka lo suna pfüo a-le anyugun tsonrio chwila; lo anyugun dan nyu kvukemvu nme ndi.

³⁸Ijipt temi dan le anyugun nshvu kebin genyu anyugun le tin la ntsin Ijipt nyu le sherhün la.

³⁹Sunggigü le nmhu nme no anyugun kesun thyüshü, lo kheje ki mah pe anyugun keben thyüshü.

⁴⁰Anyugun le hi keshüka, a-le gükhu dan nishü; lo tsangge tensü khipe anyugun kesü thyüshü.

⁴¹A-le tsonye gü khinshe shü, tson-o zü no tsun chwiryü; tsüle kazü kesinyu züri nme hontse tsunla.

⁴²Kechamvule a-le a-johokeshü kenshün, lo a-gogü Abraham rüchün lo kela genyu.

⁴³Tson-o a-le kejü kelo a-temi dan tsonrio anyugun no shekerhün thyü lo lüthyüo chwila.

⁴⁴Lo a-le tsipwen kecha dan kazü khipe anyugun tsüla; lo anyugun le temi kechanyu le thyü kenjü tsü gwenlo,

⁴⁵anyugun no a-jo lo a-jvü dan thyüzen gun gü keniti nrün genyu. Npugü shwenlo!