Read Southern Rengma Naga LÜHIN 106 Bible Online

LÜHIN 106 - Southern Rengma Naga bible

LÜHIN 106

¹Npugü shwen! Chenkeno khipe Npugü tsülo, a-le gwa kethyü genyu; kechamvule a-le sozin kehü tsüle kethonthen bin kehü genyu.

²Segü le Npugü tho kekvu dan tsü zoshwi logwa tila, nmvue a-keshwen dan aphu pe hishü logwa tila?

³Segü le kenjü gü thyüzen hüyo lo gwünkho aphu ka kemitsin tho thyü hüyo tsünyu le a-henkegwa nyu le!

⁴O Npugü, nle ntemi shwinjün kehü pe hikeshü gwünkho ka, a rüchün shülo; nle anyugun kenikeshü ka ako pe sin lolo.

⁵Ano nle kejülo kela nyu le gwakenye kethyü hyulo ano ntemi dan le a-kenyü kethyü nyu a sherhünlo ano n kenya gwen nrün dan zen-o zankechwi thyülo nrün genyu.

⁶A gun lo a gun pvübonyue mu laso; agun le kezükemu thyüla lo serimvu la sele.

⁷Agun pvübonyu le Ijipt nyu kehü ka, ntho ndun kethyü dan tsü sha mvula; anyugun le nle sozin kehü kesükela thyü kebin tsü rüchün mvu, ai zü kenhon zida günyu ketetso tsin gü ntsunla.

⁸Tson-e a-le zoshü kenjü hontse, anyugun kenishü, tsüle meno a-kekvu keda shalo nrün genyu.

⁹A-le ahza pe kenhon zida gü tsüshü, tsontsin tsüle sinla; a-le kazü kesin nyu hontse anyugun tsonri-o kentsun gü pfüthü chwila.

¹⁰Tsühontse a-le shwikerüchün nyu ben nyu anyugun kenishü; lo anyugun kenrhinyu kekvu günyu anyugun khishwishü.

¹¹Lo zü gü le anyu kenrhinyu dan kemin la; anyugun temi nme ntie nsen mvu.

¹²Tsüka anyugun le a-jo tenyen lo; anyugun le a-keshwen lüthyü.

¹³Ai anyugun le a-tho dan nmhin whütse la; anyugun le a-kenda khwen mvula.

¹⁴Ai tehen nyu anyugun le serikemvu nnyü tson-o Sunggigü semen;

¹⁵lo a-le anyugun kehi thyüpe tsü, ai keha gwakemvu nme nipe anyugun dan nyu shüla.

¹⁶Kenpen nyu anyugun le Mosa lo Aaron, Npugü temi kenshün hvu shwi anyugun yhüthyü keso ka.

¹⁷Kazü gü le kashüo Dathan nyi lola, lo Abiram logwa kemin la.

¹⁸Mah le anyugun danyu chwiryü; tson-o serikemvu dan rola.

¹⁹Anyu le Horeb nyu suna pe methu nyu nme thyülo, tson-o tsügü rüshvu tinla;

²⁰anyugun le Sunggigü zankechwi gü pe tehen tyü kehü methu tse nme men kelu la.

²¹Anyu le Sunggigü, anyu kenikelo gü, Ijipt nyu tha keda thyü keshü gü nmhinla.

²²Ham kazü günyu ndun tho dan lo kenhon zida nyu kenrin thyü keshü dantsü.

²³Tsügenyu a-le anyu nkela ti tse zola, a-le kejü kelo gü Mosa le a-ja nyu solo njüo a-nyun kekhü no ranila mvu yatse kethyü we, anyu nkela nrün.

²⁴Tson-o anyugun le a-le zoshwishü kela jo gü ge a-nyu ketenye no bin lo mvuo nyunkenyü kazü güe nkhin la.

²⁵Anyu le Npugü khwen gü nyü mvuo anyu phika nyu kebü kerü tinla.

²⁶Tsügenyu a-le swe-o anyu no tehen nyu sila titse shüla,

²⁷lo anyu tsipwen no kekho sen-o senye dan nyu nren nru-o kazü kechaki tinla ti tsela.

²⁸Tson-o Peor ka, anyugun le Baal kerüshvu nyu zen kerhün güla, lo kerhün ronzin kendi tero kerüshvu hondan tyü.

²⁹Anyu tho dan le Npugü nyun thyü nshvu pe no a-nyunnta la, tson-o anyu dan nyu kenpen le chwiryü.

³⁰Tsüka Phinehas le so gü mukela nyu shaja pe tsüshü, tsontsin kenpen gü ndila.

³¹Tsügenyu shenhe aphu a-le kemitsin nyu letse tinla.

³²Anyu le zü kepen bin Meribah ka Npugü no anyunta, lo anyugun genyu Mosa no kenjün thyüla.

³³Anyu genyu a-no anyunta rilao jozo zü kemvu zola.

³⁴Npugü le ahza khipe anyu gun tsü shüe anyu le temi dan nke mvula,

³⁵ai anyugun le senye kecha dan zen kelo-o tsüdan jvü hontse tinla.

³⁶Anyugun le tsüdan teromen rüshvuo tsügenyu nkela.

³⁷Anyugun le a-nyenyu dushvu pe teromen rüshvu la;

³⁸Anyugun le kemu kendinyu zi no tsun lo anyu nyenyu dan zi pe Kanan nyu teromen rüshvu, tson-o tezi no kazü gü gwün nrhula.

³⁹Hihontseo anyugun thodan genyu anyu le nshün mvula lo keyüla tinla.

⁴⁰Tsüselo Npugü le a-temi dan ge anyunta lola, tson-o anyu shwintsü la.

⁴¹Tson-o a-le anyu khepe senye kecha ben nyu shüla, tsügenyu anyugun kenrhinyu no anyu so gon lola.

⁴²Shwikerüchün nyu le anyugun nshwe la, lo anyu no tsüdan hensin bin shü tinla.

⁴³Gwünkechon Npugü le anyugun kenishü, ai anyu le a-ntsun-o kemu thyü kvula.

⁴⁴Tsonyatse-e a-le anyugun kechü khwen nyü kelo ka anyugun kenjün kethyü shalo-o anyugun shwishü.

⁴⁵Anyugun genyu a-le kejozen kenjü gü rüchünlo, tson-o a-le sozin kehü kesükela gü genyu anyun süni la.

⁴⁶A-le anyugun nshwe kehü nyu aphu no anyugun shwi njün kelo thyüshü.

⁴⁷A gun kenishü ta, O Npugü Sunggigü, a gun no chenkeno pe nzan kenshün gü kishü lo nzan kechwi shwen nrün genyu senye dan dan nyu a gun zenryü kequen shüta.

⁴⁸Israel Sunggigü, Npugü shwenlo; ntso kae lo nthenteyhün nyukie a-shwenlo! Temi aphu, “Amen!” tsezolo. Npugü shwenlo!