Read Southern Rengma Naga LÜHIN 107 Bible Online

LÜHIN 107 - Southern Rengma Naga bible

LÜHIN 107

¹“O chenkeno pe Npugü tsülo, a-le gwa kethyü genyu; a-le sozin kehü tsüle kethonthen bin kehü genyu!”

²Npugü le rhinhi kelo dan no tsühontse zohü lo, kenjün kethyü nyu a-le rhinnhi kelo nyu no.

³Kazü kecha ki npho lo nkhün, teso lo tesinzin hagun zen niryü kequen shü.

⁴Peha le kazü kesinyu nmhon-o nyida nme nyu-e gü yhun kelo tson fükendi hü;

⁵N nyo lo terio, anyugun dyü kenyün thame ndila.

⁶Tson-o anyugun le kenjün thyüo Npugü koshü, tsontsin a-le kenjün kethyünyu anyu kenishü;

⁷Anyugun le yhun nrün nyida nme tilo kemvu then a-le tson kenjü nme nyu anyu tsonri hü.

⁸Anyugun no a-le sozin kehü, lo ndun tho thyükeshü dan genyu chenkeno pe Npugü tsülo.

⁹Kechamvule a-le teri kehü gü no ketegvü lohü lo thakegwa pe nnyo kehügü kesü thyü shü kehü genyu.

¹⁰Peha le kezün nyu lo zünkeseryü kethyü nyu tegiron no a-phin pfüo kenjünthyü dothyü bin hü,

¹¹anyugun le Sunggigü jodan ntsun, lo ketetso tsingü jo keni la.

¹²Anyugun le thathyü kenjün thyüo kvumvula; anyugun le chela, lo temi nme anyugun keche keshü ndi.

¹³Tson-o anyugun le kenjün thyüo Npugü koshü, tsontsin a-le kenjünkethyü nyu anyugun kenishü.

¹⁴A-le kezün lo zünkeseryü kethyü nyu anyugun zen chwiryü lo anyugun kephinron dan bothüla.

¹⁵Anyugun no a-le sozin kehü lo ndun tho thyü keshü dan genyu chenkeno pe Npugü tsülo.

¹⁶A-le lazo kakhin dan boren la, lo tegi khincha bosela.

¹⁷Peha le a-kezü kemu genyu honyü, lo anyugun gwakemvu genyu meno nshweo kenjünthyü hünyo;

¹⁸anyugun le ketyüketsü lihie tyütsü nyü mvula, tson-o kesi chwida kho nni gun lahü.

¹⁹Tson-o anyugun le kenjün kethyü nyu Npugü koshü, lo a-le kenjün kethyü nyu anyugun kenishü.

²⁰A-le a-jo nishüo anyugun thyü ngwa shü, tson-o kesinyu anyugun kenishü.

²¹Anyugun no a-le sozin kehü lo anyugun genyu ndun tho thyükeshü dan aphu genyu chenkeno pe Npugü tsülo.

²²Lo anyugun no chenkeno kerüshvu dan thyüshü, lo shekerhün lüthyüo a-tho dan pe zoshülo.

²³Peha le züda nyu zürun ge, hathyü hü.

²⁴Anyugun le Npugü le nyu thyülo gwayo, lo züda nyu a-tho ndun kethyü dan hyu.

²⁵A-le ahza hoshü, tsontsin tsangkenbu terhi le soryüo zükentyü pfüso shü.

²⁶Anyugun zürun pfüso pe tsangne ki shü, lo cheo kentsun kiyü; kenshvu tsühon tse kethyü ka anyugun kepeche le ndila;

²⁷anyugun le kenzeü nyu nme hontse lihizin kezekego-o anyugun zürun thukesha tsüle a-kon kendi thyüla hünyo.

²⁸Tson-o anyugun le kenjün kethyü nyu Npugü koshü, tsontsin a-le kenjün kethyü nyu anyugun kenishü.

²⁹A-le tsangkenbu terhi thyüpe no matse la, lo züda gü kentyü no nyen tsela hünyo.

³⁰Tsontsin züda gü le matse kela genyu anyugun kenyü lo a-le anyugun zenryü anyu le nnyü kebin zürun kensenbin günyu shü.

³¹Anyugun no a-le sozin kehü lo anyugun genyu ndun tho thyükeshü aphu genyu chenkeno pe Npugü tsülo.

³²Anyugun no süda kehun dan nyu a-zan zo ngon lo, lo pülü kehun nyu a-shwenlo.

³³Npugü le züri dan thyü kelu pe kazü kesi nme, lo zükepen thyü kelu pe kesin thyüla hünyon.

³⁴Tsünyu keyhun nyu serikemvu genyu a-le kazü kegwa nme ai pe tsi kazükesi thyüla hünyon.

³⁵A-le kazükesi nme thyü kelu pe zübun thyüla, lo kazü kesin nme-e thyü kelupe züpen kebin thyüla hünyon.

³⁶Lo a-le nnyo kehünyu no tsünyu sun lo njüo nyida nme thyü yhun lola.

³⁷Anyugun no lownyu ntsi shü, lo vain bin sen shüo nshalo.

³⁸A-jochü nyu anyugun no chvükenye salo; lo a-le anyugun senru no rhokvu lamvu.

³⁹Mele anyugun nshwe, kenjünthyü lo nyun gwakemvu nyu anyugun le rhokvu lo kemeni la,

⁴⁰a-le tetsin runpe anyugun nshwe kehü raja dan ge shüo thyü pe no kazü kesi ki nmhon tinla.

⁴¹Ai a-le mele nshwe kehü rhokedyünyu penso shühü, lo anyugun kami thyüpe no tanyü dan hontse chon kenye shü hünyo.

⁴²Temi kenjü nyu le tsü shwipe a-kenyü; ai serikemvu nyu aphu no matse lahü nyo.

⁴³Senyu le thasha yo, a-no tha hidan hi rüchün shülo; temi no Npugü le sozin kehü gü rüchünlo lo.