Read Southern Rengma Naga LÜHIN 109 Bible Online

LÜHIN 109 - Southern Rengma Naga bible

LÜHIN 109

¹Ale nshwen hü nyo, Sunggigü; ntsema tsela nyalo!

²Serikemvu lo me kesa nyu le a ntsun. Lo kenkunyu le a ge jogwakemvu zobin,

³anyugun le a hunpfü jogwakemvu zo, lo a-kon kendi ka a when bin nle.

⁴Ale anyugun genyu kehi thyü kehü hontse anyu so hünyo, tson-e anyugun le a nmuni gwünzin.

⁵Tson-o ale thakegwa thyüshülo anyugun le gwakemvu pe a chün thyü, lo anyugun so lo a nrhi tse hünyo.

⁶Temi serikemvu nme kejü pe no a-ntsun shüta; a-nmu kebin nyu nme no a-zenryü a-jünkera ta.

⁷A-jün kera kethyü ka, a-no mu kebin hyu lota; a-kehikethyü no kemu nme hontse lalo!

⁸A-keyhun jon no zü lata; temi kechanyu no a-tho gü thyülo!

⁹A-nyenyu dan no tego, lo a-nu no maginyu thyüla!

¹⁰A-nyenyu dan no shvutyü; lo meno anyu le kebin karen nyutsü anyu hüshwila nda!

¹¹Tepu keshü gü no ryü a-le kebin aphu khilo la, lo a-le kenjün thyü kenjün rasha dan tsü tesin no sen tinla nda!

¹²A-shwinjün keshü temi nme no bin nya, nmvue nme no ale kheketego kela nyenyu shwi njün nya.

¹³A-tsipwen aphu sila; lo shenshün no a-zan nmhin la nda!

¹⁴Npugü no a-pvübon nyu dan kemu rüchünlo; lo a-jvü kemu nmhin lamvu nda!

¹⁵Npugü no anyugun kemu rüchün zinlo, ai kazü günyu anyugun nmhin shüla nda!

¹⁶A-le meshwinjün keshü rüchün mvuo kendinyu, rhokedyünyu lo anyunkenjün thyü kehünyu nshwe nyhün-o dushvu kela genyu.

¹⁷A-le me swentsü nyü kehü genyu keswen kesü dan no a-ge ryülo lo! A-le jochü pe metsü nyümvu, tsügenyu temi nme no jochü pe a-tsünya!

¹⁸A-le me swen ketsü pe phinya hontse ben hü, tsü no zü hontse a-min nchenlo, lo terzü hontse a-ru nyu yülo.

¹⁹Tsüno phi hontse a jepfü, lo senkekhin hontse a-senphin zinlo nda!

²⁰Hino Npugü kipon keryü a shwikerüchün nyu, thagwakemvu zo-o a ntsun kehü nyu chün thyülo nda!

²¹Ai aphu so kekvu a Npugü, nle zoshü kenjü hontse a keche shüta; nle sozin kehü kegwa günyu a kenishülo!

²²Ale tha ndi lo rhodyüo anyun ki jünpfü kehü genyu.

²³N gwün ki kengü hontse ale ndi güzhü laso; ale tsekhvü nme hontse whün sentin laso.

²⁴Kekhün genyu akishon le kvumvu laso; amin le agi lo aru nti laso.

²⁵Shwikerüchün nyu no a shwikenyü thyü laso; anyugun le a hyu shülo anyugun pe kegün.

²⁶A keche shüta, O Npugü a Sunggigü! Nle sozin kehü hontse a kenishü ta!

²⁷Anyugun no nle a kenishü letse shalo ta; O Npugü, nle tsü thyü shü le!

²⁸Anyugun le a swentsüe nle jochü pe a tsüta! A shwikerüchün nyu no keja pfüla; lo ngogü no a-kenyü lo nda!

²⁹Keja kepfü pe a shwikerüchün dan nben la; lo anyugun no keja kepfü pe anyu jelo la nda!

³⁰Ale Npugü chenno sa shüti; ale temi danda dan nyu a-shwenti,

³¹a-le rhokedyünyu no pen lo a-nmuo a-no sila titse kebin nyu ben nyu a-kenishü.