Read Southern Rengma Naga LÜHIN 112 Bible Online

LÜHIN 112 - Southern Rengma Naga bible

LÜHIN 112

¹Npugü shwen! Npugü nshvu lo a-johokeshü le a-kenyü sa kehü nyu le jochü kepfü tsin.

²A-tsipwen le kazü günyu kvulo ti; kenjü nyu shenhe le jochü pfü lo ti.

³Kanyü lo kenya le a-kanyu bin ti; lo a-kemitsin le kethonthen hüti.

⁴Kenjü nyu genyu keben le kazü gwün nben hü; Npugü le a-jvü gwa, me shwinjün lo njü.

⁵N ho, tha pe me tepu lo a-thojvü njü kehü güle jochü kepfü nyu le.

⁶Kemitsin nyu le thame ka nnula loho; mele kethonthen a-rüchün hüti.

⁷A-le jolo keshvu dan nshvu hümvu; a-le Npugü tenyen-o a-nyun tsekho bin hünyo.

⁸A-le a-shwikerüchün nyu kvulomvu kela hyula kemvuthen anyun nkhi nmvue nshvu hümvu.

⁹A-le kenrun nyu pe me kenjün, lo pe kendinyu tsüshü; a-kemitsin le kethonthen bin hü; a-le kvu lo mele a-rühvu.

¹⁰Serikemvunyu le tsü hyu shüo anyunta hü; a-le a-hü keta tseo ndi lahü; serikemvunyu kenrin we a-kon kendi thyüla hü.