Read Southern Rengma Naga LÜHIN 115 Bible Online

LÜHIN 115 - Southern Rengma Naga bible

LÜHIN 115

¹A gun mvu, O Npugü, a gun mvu, ai nle sozin kehü, lo nketsin gü genyu zankechwi pe ntsü zü!

²Nyuthyüo senye kecha no, “Anyugun Sunggigü le diki la,” tsonzo tila?

³A gun Sunggigü le tsangge hü; a-le nyu le a-kenyü yo tsü thyü bin hünyo.

⁴Anyugun teromen we temi le suna rakagi pe thyü.

⁵Anyugun mün le bin, ai jozo hümvu; a-yhütyü le bin ai hyu hümvu.

⁶Anyu nyetin le bin, ai nyülo hümvu, a-hikon le bin, ai tha rünyü hümvu.

⁷Anyugun ben le bin, ai sen-o tha thyülo hümvu, a-pha le bin, ai tsonchülo hümvu; lo anyugun le nra hümvu.

⁸Anyugun thyü keshü lo anyugun tenyen kehünyu aphu no anyugun le thyü keshü teromen hontse lalo.

⁹O Israel Npugü, tenyenlo! A-le hagun keche lo hagun gida güle.

¹⁰O Aaron kaminyu, Npugü tenyen lo! A-le hagun keche lo hagun gida güle.

¹¹Hagun Npugü nshvu kehünyu, Npugü tenyenlo! A-le hagun keche lo hagun gida güle.

¹²Npugü le ngun rüchün hünyo; a-le jochü pe n gun tsüle; a-le jochü pe Israel kaminyu tsüti a-le jochü pe Aaron kaminyu tsüti.

¹³Npugü le jochü pe a-rühvu kehü, keshe lo kedae tsüti.

¹⁴Npugü no yhun kechvü pe nle lo n nyenyue tsülo!

¹⁵Tsang lo kazü thyü keshü gü, Npugü no jochü pe ntsü nda!

¹⁶Tsang le Npugü hon, ai a-le kazü gü we pe temi tsü shü laso.

¹⁷Kesinyu nmvue kesi kazünyu yü kela dan le Npugü shwen hümvu.

¹⁸Ai n gun kerhün nyu we ntso ka gü kethonthen keti Npugü shwen hüti. Npugü shwen!