Read Southern Rengma Naga LÜHIN 116 Bible Online

LÜHIN 116 - Southern Rengma Naga bible

LÜHIN 116

¹Ale Npugü sohü nle, a-le akhwe lo a kehi nyü keshü genyu.

²A-le a khwenyü kebin genyu, ale rhün kebin then ako hüti.

³Kesi kenshvu le a tehun lola; sika kenshvu dan tsüle a-sü lola; ashese lo kenjün thyüla.

⁴Tsüka ale Npugü koshü, “O Npugü, ale nka hibin nle, a keyhun keni shüta,” tsonshü.

⁵Npugü le me so lo kemitsin gü; ngun Sunggigü le me shwi njün hü.

⁶Npugü le keche kendinyu ntsen hü; ale kenshvunyu kebin ka a-le a kenishü.

⁷Peche lolo, O a kapu, Npugü le agenyu gwasa kethyü genyu.

⁸Kechamvule nle kesinyu a kenishü; a yhüphu no che mvula lo ale chelalo kegwa nyu a-le a ntsenshü.

⁹Tsügenyu ale kerhün nyu kazünyu Npugü mhundyü nyu tsonchü ti.

¹⁰“Mele a nshwe sa laso,” ale tsonzo bin-e tenyen binti,

¹¹lo ale a shese salao, “Temi hile tenyen bin-e aphu a-kenrun hile,” tsonzo lae ale tenyen binti.

¹²Ale nyu pe Npugü tsü tila, a-le age tha kegwa thyü keshü aphu genyu.

¹³Ale kenikelo honpen gü penso-o Npugü zan koti,

¹⁴Ale a-temi dan aphu mhundyü nyu ale nyu zoshü njüyo tsüpe Npugü tsüti.

¹⁵Npugü mhundyü nyu a-temi kenshün nyu kesi le a-min tsensa.

¹⁶O Npugü, ale n go le; ale n lothyü ti, ajvü le thyü kehü hontse. Nle kesinyu a kenishü laso.

¹⁷Ale chenkeno kershvu thyüpe ntsü lo Npugü zan koti.

¹⁸Ale a-temi dan aphu mhundyünyu ale nyu zoshü njüyo tsü pe Npugü tsüti.

¹⁹Npugü ka gü kamhun nyu, O Jerusalem, n dan nyu tsü hontse ti. Npugü shwen!