Read Southern Rengma Naga LÜHIN 118 Bible Online

LÜHIN 118 - Southern Rengma Naga bible

LÜHIN 118

¹O chenkeno pe Npugü tsülo, a-le gwa kethyü genyu; a-keso le kethonthen bin hünyo.

²Israel no zolo, “A-keso le kethonthen bin hü nle.”

³Aaron kaminyu no zolo, “A-keso le kethonthen bin hü nle.”

⁴Senyu le Npugü nshvu hüyo tsünyu no zolo, “A-keso le kethonthen bin hü nle.”

⁵Ale shekese nyu bin-o Npugü koshü; tsontsin Npugü le a kehi nyüshüo a khishwi shüla.

⁶Npugü le azen hü, ale nshvumvu; temi le age nyu thyü lo tila?

⁷Npugü le ache titse hü; tsügenyu a kenrhinyu kvulo mvukela ale hyuti.

⁸Temi tenyen kebin nyeki Npugü techwen kelo gü we gwakvu.

⁹Rajanyu dan tenyen kebin nyeki Npugü techwen kelo gü we gwakvu.

¹⁰Senye aphu ahun kenthün bin; ai Npugü zan sen-o ale tsüdan aphu nkela!

¹¹Anyugun le ahunpfü bin, ahun kenthün shü pfü bin; ai Npugü zan sen-o ale tsüdan aphu nkela!

¹²Anyugun le khu hontse ahunpfü bin, anyugun le nnyü pe tsehü sen kero mah hontse bin ai Npugü zan sen-o ale tsüdan aphu nkela!

¹³A when salo kela genyu ale che gü jüla! ai Npugü le ache shü.

¹⁴Npugü le athyü nko nkin shü; lo a-le a kenilo.

¹⁵Kemitsin nyu phika nyu kvukelo nyunkenyü lü khwen nyü shüta: “Npugü kekvu le tsü thyüshü!

¹⁶A-kekvu le kvukelo senryüo ngun tsü laso-- Npugü kekvu le tsü thyüshü!”

¹⁷Ale sila loho; ai yhun-o Npugü thodan zope mehi ti.

¹⁸Npugü le a nthyü nnyü sa shü, ai a-le ano sila mvu.

¹⁹Kemitsin chwida dan khinshe pe atsü shüta; ano tsünyu yüo chenkeno pe ntsü nrün genyu.

²⁰Hile Npugü chwida güle; Kemitsin nyu le tsünyu yüti.

²¹Nle a kehi kenishü lo a kenikelo gü thyülo kela genyu ale n cheno le.

²²Ka kethyünyu dan le a-min kendi hontse khe kela tso gü le sen mvulo keshvu tsin thyülo laso.

²³Hile Npugü le thyü keshü; tsüle ngun yhühyu ka ndun kethyü.

²⁴Hile Npugü le thyü keshü jon güle; ngun tsünyu shekerhün thyü lo n kenyülo ti lenu.

²⁵O Npugü, agun le nka hibin nle, agun kenishü ta! Lo gwakenye kelo pe agun tsüta!

²⁶Npugü zan nyu ryükejü güno jochü kepfü gü thyülo! Agun le Npugü ka günyu jochüpe ntsü bin nle.

²⁷Npugü le Sunggigü, lo a-le keben pe ngun tsü laso. Senro dan senlo-o nga lo, lo tsonchü kershvubin gü hun lo!

²⁸Nle a Sunggigü, lo ale chenkeno pe ntsüti; nle a Sunggigü, ale nkeda pe zoti.

²⁹O chenkeno pe Npugü tsülo, a-le gwa kethyü genyu; a-keso le kethonthen.