Read Southern Rengma Naga LÜHIN 119 Bible Online

LÜHIN 119 - Southern Rengma Naga bible

LÜHIN 119

¹Meno nmulo keha keyhun nyu lo Npugü jvü günyu tsonchü kehü güle jochü kepfü nyu.

²A-jo hokeshü then kehü lo a-nyun aphu sen-o a-fü kehü nyu le jochü kepfü nyu.

³Anyugun le thyüzü mvu; anyugun le Npugü tson nyu tsonchü hü.

⁴Nle agun no n jodan thenzin hü lotse ahza khishü.

⁵O n jodan thyüzen binlo nrün genyu a tson dan no njü bin lo nda!

⁶Tsonlo yatselo ayhütyü le n johokeshü dan ge nnu mvu binlo-o ale kejapfüla loho.

⁷Ale n jo kemitsin dan shakelo ka, ale anyun njü-o nshwen loti.

⁸Ale n jodan zen tile; O a khela nyata!

⁹Dihontse selo nme le a-keyhun nshün bin lo gwa tila? Tsüle n jo then kelo genyu ti.

¹⁰A nyun aphu sen-o ale n fü ti; ano n johokeshü nken-o nmhon tinla nyata.

¹¹Ale n ntsun-o kemu thyü tinla lo keshvu genyu n jo pe a nyun nyu shüpfü hü nle.

¹²Ale nshwen hü nle, O Npugü; n jvü pe a senthyü shüta.

¹³Ale n mün nyu chwikeryü n jvü dan aphu zo pe me hi shü laso.

¹⁴Ale kenya kechon le bin kelo nyeki n johokeshü dan kethen le a kenyü kvule.

¹⁵Ale n jodan rüchün ntsun lo ntson dan nri hüti.

¹⁶Ale n jvü dan le a kenyü hüti; ale njo nmhin la lohao

¹⁷Ngogü chesa shüta, n jozen hü nrün genyu.

¹⁸Ano n jvünyu ndun kethyü dan hyulo nrün genyu a yhütyü khinshe shüta.

¹⁹Ale kazü nyu kenjwen nyu nme le; n johokeshü dan pe a kebu la nyalo.

²⁰A kapu le gwünkho aphu ka n jvüdan nnyü ho ritsin bin hünyo.

²¹Nle ketekho kehünyu rho hünyo; n johokeshü thyü zen kemvu nyu swentsü laso.

²²Ale n jvüdan thyüzen kehü genyu, anyugun le a shwinyü lo a kenshwe tsü sen tinla lo.

²³Rajanyu jule a ntsun-o tharhi bin-e ngogü le n jodan rüchün ntsun binti.

²⁴N senkethyü jo dan tsüle a kenyü, tsüdan le a senkethyü nyu.

²⁵Ale kvulomvu lao kenphü nyu che laso; nle zo kenjü hontse athyü nrhün shüta.

²⁶Ale atho dan zo keshü ka nle ajo kenishü; n jvüdan pe a senthyü shüta.

²⁷Ano n jodan shakekho lota, lo ale ntho ndun kethyü dan rüchün ntsun hüti.

²⁸Nyun gwakemvu le a sokvulo laso; nle zo kenjü hontse athyü nkvu shüta.

²⁹Tson gwakemvu pe a nrhi shülo; lo shwinjün-o n jvü pe a senthyü shülo.

³⁰Ale ketsin tson gü kejü lo laso, lo n jvüdan pe a mhundyü ka shüzin hü.

³¹O Npugü, ale n senkethyü jodan then hü nle; a khipe keja kepfü nyu shünya.

³²Ale n johokeshü dan then ti, lo nle ano thasha kenyelo nrün genyu.

³³O Npugü, n jodan kon pe a senthyü shülo; lo ale a-gwünkho aphu tsü thenti.

³⁴Ano n jozen lo nrün genyu thasha kekho kelo pe atsü shüta lo ale anyun aphu pe tsü thyü zen ti.

³⁵A tson tsin pe n johokeshü tson günyu shü shü ta, ale tsünyu a kenyü kehü genyu.

³⁶A nyun thyü pe kenya kefü mvule n jvü kipon shülo.

³⁷Kenrun kenryü nyu a yhütyü thyü kelu shülo; lo n tson nyu kerhün pe atsü ta.

³⁸N nshvu kehünyu genyu nle zoshwi shü kenjü tsü n gogü ka zo ketseni shülo.

³⁹Ale nshvu kehü tetsin gü pe a nrhi lalo; n jvü dan le gwa kethyü genyu.

⁴⁰Hire, ale n senkethyü jodan nnyü hü; n kemitsin nyu kerhün pe atsülo.

⁴¹O Npugü nle ditsüki aso hüyo pe a hi shüta, lo nle zo kenjü hontse a kenishü ta.

⁴²Tsonyatselo ale a nshwe kehünyu jokeni keshü kon le bin loti; ale njo tenyen kehü genyu.

⁴³Lo a ge ketsin jo gü sen tinla nya, a kenrin le n jo nyu kebin genyu.

⁴⁴Ale kethonthen n jvü zen hüti.

⁴⁵Lo ale kekhin kendinyu hüti, ale n senkethyü jo gü fü kelo genyu.

⁴⁶Ale rajanyu mhundyü nyue n jo pe zo ti; lo keja loho.

⁴⁷Kechamvule ale n johokeshü dan tsüle a kenyü, ale tsü sohü.

⁴⁸Ale n johokeshü dan so lo rühvu hü, lo ale n senkethyü jo dan tsü rüchün hüti.

⁴⁹Nle n go, a higü ka zoshü kenjü a kenrin le kebin gü tsü rüchün shülo.

⁵⁰A kenjün kethyü nyue nle a ka zoshü kenjü tsüle anyun thyü nbwen lo kerhün khishü hü.

⁵¹Ketekho kehünyu le azintse a shwinyü hü, ai ale n jvünyu ranila mvu.

⁵²O Npugü, ale nduka n jvü dan rüchün keshü ka, anyun thyü nbwen lo hü.

⁵³Serikemvunyu le n jvü borho kebin hyu keshü ka, anyunta lahü.

⁵⁴Kazünyu kenjwen kahi n senkethyü jo pe alü thyü.

⁵⁵O Npugü kheje ki ale n zan rüchün lo n jvü then hü nle.

⁵⁶Ale n jokezen nyu jochü hyulo.

⁵⁷Npugü le a kenyü aphu khishü kehü gü, ale n jodan then titse zoshwishü laso.

⁵⁸Ale anyun aphu sen-o nka hi hü nle; nle zo kenjü hontse a shwinjün shülo.

⁵⁹Ale a tson dan rüchün shüo, n jo kipon ryü laso.

⁶⁰Ale ntsüla mvuo whütse n johokeshü dan thenlo la.

⁶¹Serikemvu gü le chwe tso pe a nsen njü, ai ale n jvü gü nmhin lamvu.

⁶²N kemitsin jvü dan genyu tsanglu kie ale so-o nshwen hü.

⁶³Ale n lotho nyu aphu lo senyu le n senkethyü jo then hüyo tsüdan pvü güle.

⁶⁴O Npugü, n keso le kazü sü bin; n johokeshü dan pe a senthyü shüta.

⁶⁵O Npugü, n jo hontse nle n gogü ge gwa sa shü.

⁶⁶Kensü lo thakesha pe a senthyü shüta, ale n jo dan tenyen kehü genyu.

⁶⁷A nthyü nnyü keshü mhundyü we ale tson gwünzü tinla; ai ntso kawe ale n jo then hü.

⁶⁸Nle gwa lo thakegwa thyü hü; njo pe a senthyü shüta.

⁶⁹Ketekho kehünyu le nku-o arüla zohü; ai ale anyun aphu sen-o n senkethyü jo thyüzen hünyo.

⁷⁰temi hidan le thasha kekho kelo ndi; ai awe n jvü le a kenyü le.

⁷¹Ano n jodan shalo nrün genyu, ale shaja thyü kela tsüle agenyu gwa laso.

⁷²Suna raka yie yie nyeki n tejvü güle agenyu gwakvu.

⁷³Nle a rhenshü lo athyü kezegwa shü; ano nle johokeshü dan shalo nrün genyu thasha kekho kelo pe atsüta.

⁷⁴Ale n jonyu a kenrin le kebin genyu nnshvu kehünyu le a hy-o a-sherhün ti.

⁷⁵O Npugü, nle me jün kekera tsüle kenjü nyu lo nle a nthyü nnyü keshü tsüle njü tse ale sha.

⁷⁶Nle ngogü ka n joshü kenjü hontse, nle sozin kehü tsü pe anyun thyü nbwen shüta.

⁷⁷A no rhünlo nrün genyu n shwikenjün no aki ryüta, n tejvü le a kenyü kethyü genyu.

⁷⁸Ketekho kehü güno keja pfüla lo, anyugun le nku-o a nmu kethyü genyu; a we, n senkethyü jodan rüchün hüti.

⁷⁹N nshvu kehü nyu no n jo shalo nrün genyu aki ryü nda.

⁸⁰A lope keja kepfü nyu shüla mvu nrün genyu, anyun no n jo nyu nmulo keho thyülo nda.

⁸¹Ale nno a kenikeshü khwe pe a hokeli laso; ale n jo nrin bin hü.

⁸²A yhütyü le nle zokeshü tsü nrilo keho thyü bin nle; “Nle digwünkho ka anyun thyü nbwen shü tila?” tse ale ketso hü nle.

⁸³Ale mah kekhu nyu thyügitsun kenko hontse kelasi genyu; tson-e ale n johokeshü nmhin lamvu.

⁸⁴N gogü no dithenki khwen mvulo shvula? Nle dinyü a nthyünnyü kehü nyu jün kera tila?

⁸⁵Ketekho-o n tejvü zen hü kemvunyu le chwen tso pe a nsen bin nyo.

⁸⁶N johokeshü dan aphu tenyen lokü; anyugun le kenku nyu a nthyü nnyü bin nyo; a che shülo!

⁸⁷Anyugun le a dushvula khe tse, ai ale n senkethyü jodan khe lamvu.

⁸⁸Ano n jodan thyüzen lo nrün genyu nle sozin kehü nyu a keyhun nrho shüta.

⁸⁹O Npugü, n jo le tsangge kethonthen nnulo keho thyü pe bin laso.

⁹⁰N ketsin le shenhe aphu nyu hü; nle kazü gü thyüshü lo tsüle bin.

⁹¹Nle thyüshü kela tsüle nthu keti bin; tsü aphu n go genyu.

⁹²N tejvü le athyü kesherhün shü kemvu we, ale a kenjün kethyü nyu tsü nkela nrün.

⁹³Ale thame ka n senkethyü jodan nmhinla loho; tsüdan ge nle kerhün pe a ketsü genyu.

⁹⁴Ale nhon le, a kenishülo; ale n johokeshü dan zen ti.

⁹⁵Serikemvunyu le a nkela ti tse a khwe bin; ai ale n jodan rüchün bin hü nle.

⁹⁶Tha lihie a-keni le kebin ale shalo laso; ai n jodan we gwapen.

⁹⁷O, ditsüki thyü n tejvü le a kenyü la! Ale jongwün tsü rüchün hü nle.

⁹⁸Gwünkho aphu ka n jo le azen kehü genyu tsüle a thyü pe a shwikerüchün nyu nyeki thasha kvula hü.

⁹⁹Ale n jodan rüchün ntsun kehü genyu, ale a senkethyünyu aphu nyeki thasha kvu.

¹⁰⁰Ale n senkethyü jodan thyüzen kehü genyu, Püshünyu nyeki thasha kvu.

¹⁰¹Ale n jo thyüzen nrün genyu, serikemvu tson lihi nyue apha sünilo la.

¹⁰²Nle a senthyükeshü genyu ale n jo nyu rani tinla mvu.

¹⁰³N jodan le agenyu ditsüki thyü nnyüla, khuzü nyeki amün nyu nnyü kvule!

¹⁰⁴N senkethyü jonyu ale thasha kekho lo; tsügenyu ale ketsin kemvu tson lihie ntsü.

¹⁰⁵N jo le a pha keben mahne lo atson keben nme le.

¹⁰⁶Ale n kemitsin jodan then titse se-o zo laso lo tsüle ketsin.

¹⁰⁷A nthyü nnyü sa laso, O Npugü; n jo hontse kerhün pe atsülo.

¹⁰⁸O Npugü, ale chenkeno kehi pe n ketsü lo lota, lo n jodan pe a senthyü shüta.

¹⁰⁹Ale silalo kegwa nyu hüzin bin nle, tson-e ale n tejvü nmhin lamvu.

¹¹⁰Serikemvu gü le a nsen njü, ai ale n senkethyü jodan gwünzü lamvu.

¹¹¹N jodan le kethonthen ahon le; ele, tsüle anyun ki shekerhün gü le.

¹¹²Ale sikemvu then n tejvü dan thyüzen titse rhilo laso.

¹¹³Ale kenyu hvu kehünyu shwirüchün, ai n tejvü le a kenyü.

¹¹⁴Nle a kebu bin le, lo a gida; ale n jo nyu a kenrin le bin nyo.

¹¹⁵Hagun gwakemvu kethyü nyu, a nrhi tinla lo; ale a Sungigü johokeshü dan then tile.

¹¹⁶Ano yhunlo nrün genyu nle zo keshü hontse a nmhu lota, lo a kenrin nyu a khipe keja kepfü thyüla nya!

¹¹⁷Ano n jodan rühvu zin hülo nrün genyu, a nmhu lo-o a kenishü ta.

¹¹⁸Nle n tejvü gwünzü tin kelanyu aphu kenila hünyo; ele, anyugun kelikelu tsüle kenrun.

¹¹⁹Nle kazü nyu serikemvunyu aphu pe kerhu nme hontse laso; tsügenyu n jodan le a kenyü.

¹²⁰Ale n kenshvu genyu ndün bin nle, lo ale nle me jün kekera tsü nshvu le.

¹²¹Ale nyu le njü lo gwayo tsü thyüshü; a khepe a nshwe kehünyu tsüla nyalo.

¹²²Nle n gogü cheshü titse n johoshü lo; ketekho kehünyu no a nshwela nyalo.

¹²³A yhütyü le nle kenikelo, lo nle kemitsin nyu zoshwi kenjü gü thyüpen keshü nrilo ho bin laso.

¹²⁴Nle sozin kehü nyu tsü n gogü ge thyüshü, lo n jo pe a senthyü shülo.

¹²⁵Ale n go le; ano n jodan shalo nrün genyu thasha kekho kelo pe atsülo!

¹²⁶Npugü, nle thyükeshü gwünkho so, temi dan le n tejvü borho bin kela genyu.

¹²⁷Ale suna lo suna kenshün nyeki n johokeshü dan le a kenyü kvu.

¹²⁸Tsügenyu ale n senkethyü jo aphu then hü nle; ale tson ketsin kemvu lihie ntsü.

¹²⁹N jodan le ndunthyü; tsügenyu ale anyun aphu sen-o tsü thyüzen hünyo.

¹³⁰N jo dan kon zokho keshü le keben khishü hü; tsüle thasha kekho kelo khipe tha rüchün lo shakemvu nyu tsüshü hünyo.

¹³¹Ale n johokeshü dan nnyü ho kethyü genyu amün kvu pfüo henfü tse shü hü.

¹³²Nle n zan nyu a-kenyü kehünyu ge thyüshü kehü hontse aki raniryüo a shwi njün shüta.

¹³³Nle zoshü kenjü hontse chela lo kegwanyu a ntsenlo; lo gwakemvu güno a nyekvula nya.

¹³⁴Ano n senkethyü jodan zenhü nrün genyu temi le a kenshwe nyu a rhinhilo lo.

¹³⁵Nmhun keben pe n gogü nrishü, lo n tejvü pe a senthyü shülo.

¹³⁶Temi le n tejvü zen kemvu genyu ayhüphu che pe züri ketsun hontse lale.

¹³⁷O Npugü, nle kemitsin gü le, lo n tejvü le njü.

¹³⁸Nle khikeshü tejvü le aphu nshün lo njü.

¹³⁹A kenrhinyu le n jodan nmhin kela genyu, anyunkenta le mah hontse anyun ro bin nyo.

¹⁴⁰Nle zoshwi keshü jo le nshün ri! Lo n gogü le tsüle a-kenyü hü!

¹⁴¹Ale she lo mele a nshwe hü, tson-e ale n senkethyü jodan nmhin lamvu.

¹⁴²N kemitsin le kethonthen, lo n tejvü le a-zintse ketsin.

¹⁴³Kenjün kethyü lo nyunkenkhi le agen ryü ai n johokeshü dan le akenyü.

¹⁴⁴N jodan le kethonthen ketsin; ano yhun nrün genyu thasha kekho kelo pe atsülo.

¹⁴⁵A nyun aphu pe ale nko bin nle; O Npugü, a kehi kenishülo, ale n jvü zen ti!

¹⁴⁶Ale nko hü; ano n jozen nrün genyu a kenishü ta.

¹⁴⁷Lonyü tsangben kemvu ka ale soryü nka keche hi; ale n jo nyu akenrin le bin nle.

¹⁴⁸Nle zo keshü jo rüchün nrün genyu ale khejenyue ayhü ketsümvu.

¹⁴⁹Nle sozin kehünyu a khwen nyü shülo; O Npugü, n shwikenjün nyu a keyhun ntsen shülo.

¹⁵⁰Gwakemvu sen-o a nthyünnyü kehü nyu le akho nni ryü zhü; anyugun le thame ka n jvü zen hümvu.

¹⁵¹Ai O Npugü, nle akho nni bin nyo, lo n johokeshü dan aphu ketsin.

¹⁵²Ale ndukanyu n senkethyü jo sha laso, nle kethonthen genyu tsüdan thyüshü laso.

¹⁵³A kenjün kethyü nrishüo, akenishülo, ale n tejvü nmhin la kemvu genyu.

¹⁵⁴A jünzo-o a rhinhi shülo; nle zokeshü hontse kerhün pe atsülo.

¹⁵⁵Kenikelo le serikemvu gü zen nithen, anyugun le n tejvü dan zen hü kemvu genyu.

¹⁵⁶O Npugü, n shwikenjün le gon; n shwikenjün nyu a kenishülo.

¹⁵⁷A nthyünnyü kehü lo a shwikerüchün nyu le chonsa, ai ale n jonyu rani tinla mvu.

¹⁵⁸Ale kekhün kekho kehü dan nrishü, ale tsü shwi ntsü rila, anyugun le n jodan zen hü kemvu genyu.

¹⁵⁹Ale dihontse n senkethyü jo le akenyü hüyo nrishülo, Npugü. Nle sozin kehü hontse akeyhun ntsen shüta!

¹⁶⁰N jodan aphu ketsin; lo n kemitsin jvü lihie kethonthen bin hü.

¹⁶¹Raja dan le a-kon kendi ka a nthyü nnyü la, ai ale n jo nshvu lo rühvu hünyo.

¹⁶²Temi nme le kenya kechon hyulo-o a-sherhün kehü hontse njo le akenyü hünyo.

¹⁶³Ale kenku nyu shwinyü mvu lo ntsü, ai n tejvü le akenyü.

¹⁶⁴N kemitsin jvü dan genyu ale khenyü me gwün tsenyü ge nshwe hünyo.

¹⁶⁵N tejvü le a-kenyü kehü nyu le nyun kebwen keda le bin hü; thame-e anyugun pha nsü loho.

¹⁶⁶O Npugü, ale n kenikelo nrin bin, lo n johokeshü dan zen hünyo.

¹⁶⁷Ale n jodan zen hü; lo tsüle akenyü ritsin.

¹⁶⁸Ale n senkethyü lo n johokeshü zen hü; ale thyü kebin aphu nle hyu bin nyo.

¹⁶⁹O Npugü, a kenra khwen no nmhundyü ka ryü lota; n jo hontse thasha kekho kelo pe a tsüta!

¹⁷⁰A kehi no nmhundyü ka ryü lota; n jo hontse a khishwi shüta.

¹⁷¹Nle n jo pe a senthyü keshü genyu, ale nshwen hüti.

¹⁷²N jodan aphu njü kethyü genyu, ale n tejvü ge keron lüthyü ti.

¹⁷³Ale n senkethyü jodan kejülo kela genyu, nle a kecheshü ti tse ndalo lo.

¹⁷⁴O Npugü, ale n kenikelo nnyü bin nle! Lo n tejvü le akenyü le.

¹⁷⁵Ano n shwen hülo nrün genyu ano yhun bin ta; lo n jodan no a cheshü nda.

¹⁷⁶Ale nmhen kela tanyü nme hontse tson gwünzü tinla so; ai ale n johokeshü dan nmhinla kemvu genyu n gogü hi fülo ta.