Read Southern Rengma Naga LÜHIN 132 Bible Online

LÜHIN 132 - Southern Rengma Naga bible

LÜHIN 132

¹O Npugü, David lo a-le kenjün kethyü tsü aphu nmhin lanya.

²Dihontse a-le Npugü ka a-johokeshü lo Jakob Sunggigü ka keswen thyüshü yo, rüchün shülo.

³“Ale a kanyu yü nmvue a zhü nyu gü loho;

⁴Ale rüyü nmvue zhü loho,

⁵Ale Npugü, Jakob Sunggigü genyu kensenbin nme fülo kemvu then we.”

⁶Hire, agun le Bethlehem nyu kejozenkelo Khinpha rüla nyülo la, Jearim low nyu tsü hyulo laso.

⁷“Ngun Npugü kaki gü tile; ngun a-phanyu a-rüshvu tile nu.”

⁸O Npugü, nle n kekvu zansü kejozenkelo Khinpha sen n Kershvuka günyu ryüo kethonthen hinyu binlo.

⁹N püshükeda dan no azintse kenjü gü thyülo; lo n temi dan no shekerhün nra senlo.

¹⁰Nle n gogü David ka zoshü kela; nle kejükelo raja khila nyalo, Npugü.

¹¹Npugü le David ka swen-o zoshü kela gütsü nyu a-le ranila loho; “Ale nnyu nme pe raja thyü shüti, a-le n siki keda thyüti.

¹²N nyenyu dan le ale pe anyugun senthyü shü nrün a senkethyü jo lo kejozenkelo dan thyüzen hü yatselo, anyugun nyenyu dan-e no kethonthen raja thyüti.”

¹³Npugü le Zion kejülo kela genyu; a-le tsüpe a-ka thyü nyü bin:

¹⁴“Hile kethonthen akerüyü bin; hile akenyü tsügenyu ale hinyu binti.

¹⁵Zion le sen mvulo keshvu aphu ale khipe tsü shüti; ale chvü pe a-dan nyu kendi nyu dan no a-kesü thyü loti.

¹⁶Ale kenikelo pe a-püshükeda nyu nben ti, lo a-temi dan le shekerhün thyü nra sen ti.

¹⁷Tsükitsü ale David genyu tsipwen nme no chwiryü ti; ale terzü pe yünlo kela gü genyu mah kenben nme nda laso.

¹⁸Ale kejakepfü pe a-shwikerüchün nyu ju nben ti; ai a-rajaphen we no gwakenye lo gingvü ti.”