Read Southern Rengma Naga LÜHIN 135 Bible Online

LÜHIN 135 - Southern Rengma Naga bible

LÜHIN 135

¹Npugü shwenlo! Npugü zan shwenlo, O Npugü gonyu dan, a-shwenlo lo,

²hagun Npugü kanyu, lo Npugü Kershvuka mhun nyu bin kehü dan.

³Npugü shwenlo, Npugü le gwakethyü genyu; a-le me shwinjün kehü genyu lüthyü a-zan shwenlo.

⁴Npugü le a-npvü a-genyu Jokob kejülo laso, Israel le a-hon le.

⁵Npugü le gon, lo ngun Npugü le tero aphu soki tse kethyü ale sha bin nyo.

⁶Npugü le tsangge lo kazü nyu, züda nyu lo kentsun aphu nyu a-le nyuthyü nyüyo thyü hü.

⁷A-le kazü keniki nmhun thyü pe no soryü; tsangkenri genyu tsangkekechwe thyü shü, lo a-kenya khinnyu tsangkenbu dan sen chwiryü hü.

⁸A-le Ijipt nyu temi lo senrue nyuri gü dushvula.

⁹O Ijipt, n dan nyu zansü lo nduntho dan nipe Faro lo a-go dan ntsun keshü gü tsüle a-le.

¹⁰A-le senye kechon nkela lo raja kechon dushvula:

¹¹Amor nyu raja Sihon, Bashan raja Og lo Kanan nyu raja dan aphu.

¹²Tson-o anyugun kazü pe a-temi dan tsüla; Israel nyu dan no gwen lotse la.

¹³O Npugü, n zan le kethonthen hü; shenhe aphu n zan rüchün hüti.

¹⁴Npugü le a-temi dan nokhin loti; lo a-gonyu shwinjün shüti.

¹⁵Senye kechadan teromen we temi ben lope kethyü suna raka.

¹⁶Anyugun mün le bin, ai jozolo hümvu, anyugun yhütyü le bin, ai hyu hümvu.

¹⁷Anyugun nyetin le bin, ai thakhwen nyülo hümvu; lo kehen teshe le ndi.

¹⁸Anyugun thyükeshü jue anyugun hontse. Ele, anyugun tenyen kehünyu lihigü tsü hontse ti!

¹⁹O Israel kami, Npugü shwenlo; O Aaron kami, Npugü shwenlo!

²⁰O Levi kami, Npugü shwenlo; hagun Npugü nshvu kehü dan, a-shwenlo!

²¹Jerusalem nyu yhun kebin dan, Zion nyu Npugü shwenlo! Npugü shwenlo!