Read Southern Rengma Naga LÜHIN 139 Bible Online

LÜHIN 139 - Southern Rengma Naga bible

LÜHIN 139

¹O Npugü, nle a kese shwio asha laso!

²Ale dun-e soe nle shabin nyo; nle nithen ki nyu a kerüchün aphu sha.

³Ale thathyü bin le rüyü bin yo nle ahyu; nle atha aphu shakü bin nyo.

⁴Ale jozo kemvu kanyu, ale nyuzo tiyo nle sha.

⁵Nle ate lihizin aphu hunkenthün bin nyo; nle n kekvu nyu a ntsen hü.

⁶Nle a rüla kesha tsüle a dunthyüri, ale tsü shati loho.

⁷N kebuo ale dipon gü mon? Nmvue n mhundyü nyu ale tin-o diki gü mon?

⁸Ale tsangge küe, nle tsünyu hü; ale kesinyu rünyi ki tsüe nle tsünyu hü.

⁹Ale npho nken-o nyetinla nmvue nkhün bin nithen tsin ki yhun tinlae,

¹⁰tsükie nle bin-o atson tsin, lo akeche hüti.

¹¹Ale kezün nti no ahen lola, lo akho ka keben gü no kezün thyü la lo tse hilo gwa,

¹²tsonya tse-e n genyu we kezün güle zün mvu, khejenyue nhenyu tsangkeben ka keme. N genyu we kezün le keben hontse.

¹³Nle agen kebin dan aphu thyüshü; a jvü ginyu tsü rhen kerhün shü.

¹⁴Nle kenrin lo ndunthyü, tsügenyu ale nshwenti; n tho dan le ndun thyü le. Ale a nyun aphu pe tsüsha bin nyo.

¹⁵A jvü ginyu a-shvu thyü a-ru dan rhen pe keren kebin ka, ale tsüki kekebu ki min kebin, ale tsüka bin tse kethyü nle sha laso--

¹⁶a nnyu kelo mhundyü nle a hyu la. Jon tho pe atsü kenjü dan, tsüdan nme binzen kemvu kanyu aphu n lesü nyu thu kü pe bin laso.

¹⁷O Sunggigü, n kendo le a genyu ditsüki a-min tsenla; tsüdan le ditsüki nmhun la!

¹⁸Ale tsü swüti yatselo, tsüle hachon nyeki chonkvu. Ale chonso keryü kae, nzen hüzun.

¹⁹O Sunggigü, nno serikemvu gü dushvu lanyü! Tson-o tezi nnyü kehü temi dan tsüno a nrhi lalo!

²⁰Anyugun le n zo nshvu, lo gwakemvu zo-o n zan ntsun bin hünyo.

²¹O Npugü, ale n ntsü kehünyu ntsü hü mvu ole! Lo n ntsun kehünyu nkhin hümvu ole!

²²Ale tsüdan shwi ntsü ritsin; anyugun lope a shwikerüchün nyu le tse hünyo.

²³O Sunggigü, a kese shwio, a nyun shalo ta; a kegwa keshvu shwishüo a kerüchün sha lota.

²⁴Tson-o serikemvu tson peha le a ge bin mvule mvuyo shwishüo, atson ripe kethonthen tson nyu shüta.