Read Southern Rengma Naga LÜHIN 141 Bible Online

LÜHIN 141 - Southern Rengma Naga bible

LÜHIN 141

¹O Npugü, ale n kohü nle; ntsoka a keche shüta! Ale nko keshü ka, akehi nyü shüta.

²A kehi no nmhundyü nyu tharün kegwa hontse, lo a ben shwe keshü no ngwünki kerüshvu nme hontse lo nda.

³O Npugü, rikhun nme no amün ka bin lo, a mün kakhin gü khwen bin lota.

⁴Ano gwakemvu nme nnyü nyata, lo temi gwakemvu nyu zen-o anyugun serikemvu tho nyu kerhün nya. Ano anyugun keho nyu thame tyütsü nya nda.

⁵Temi kegwa gü no a kenjün genyu avü nmvue arho ta, ai thame kae serikemvu gü terzü pe ape yün nyalo, ale anyugun serikemvu ntsun-o kehi thyüzin kehü genyu.

⁶Dinyü anyugun khipe anyugun nmula nrün nyu ben nyu shüla tiyo, tsü kinyu Npugü jo le ketsin tse kethyü anyugun le shalo ti.

⁷Sen dukho dura kela hontse, anyugun ru no sika teki nren-nru lati.

⁸Ai kekvutsin Npugü, ale n tenyen hünyo. Ale nno a ntsen lolo tse fü hü nle; akhe kemeni la nyata.

⁹Anyugun le a nden kebin lo temi gwakemvu nyu le a nsen kebin nyu tsü a ntsen lota.

¹⁰Serikemvunyu dan no anyu npvü anyugun joh ka chela lo, lo a we no nrhi lota.