Read Southern Rengma Naga LÜHIN 143 Bible Online

LÜHIN 143 - Southern Rengma Naga bible

LÜHIN 143

¹O Npugü, a kehi nyü shüta! N kemitsin nyu a kehi nyü shü; n joketsin nyu a kehi keni shülo!

²N gogü pe ketso kethyü nyu shü nyalo; kerhün nyu nme-e n mhundyü nyu kemitsin kendi genyu.

³A shwikerüchün güle a hülo la; a-le a keyhun süshe pe kazü nyu jonren la. A-le a-no nduka sikela nyu hontse kezün nyu dun tin laso.

⁴Tsügenyu a kapu le pesi laso; ashese ritsin la sele.

⁵Ale gükela jon dan tsü rüchün; lo nle thyü keshü tho dan tsü aphu kemvu hü nle, n ben le nyuthyü shüyo ale tsü rüchün ni hü nle.

⁶Ale a ben shwe pe nki shüo hi hü; a kapu le kazü kesin hontse nnyüo teri hü nle.

⁷O Npugü, ntsoka a kehi kenishü ta! A kapu le kvumvu laso. A kebu nyata, ale tekhwün kü nyu yü kelanyu hontsela lo keshvu genyu.

⁸Ale n tenyen kehü genyu, ano lonyütsen nle sozin kehü nyü lota. Ale hi kebin genyu ano gü mvulo keshvu tson tsü pe a senthyü shüta.

⁹O Npugü, a shwikerüchün nyu ben nyu a kenishü ta; a ntsenlo lotse ale nkiryü bin nyo.

¹⁰Nle a Sunggigü genyu, n kenda gü thyülo nrün pe a senthyü shülo. N Kapu kegwa no a tson tsin pe tson kenjü nyu gü shülo.

¹¹O Npugü, n zan genyu a keyhun ntsen shülo; n kemitsin nyu kenjün kethyü ka a khishwi shülo!

¹²Lo nle sozin kehü günyu a shwikerüchün nyu dan dushvula lo, a kenrhinyu aphu nkela lo, ale n go gü genyu.