Read Southern Rengma Naga LÜHIN 144 Bible Online

LÜHIN 144 - Southern Rengma Naga bible

LÜHIN 144

¹A kentsen gü, Npugü shwenle! A-le teri kethyü jvü pe a senthyü lo kega do a no shalo.

²A-le a kentsen gü lo a kenogü, akesun gü lo a kenikelo gü, a gi lo ale a-techwün lo kehü gü. A-le senye dan khipe a hensin nyu shü.

³O Npugü, temi hile nyu le tseo nle a-sü shü hü nla; nmvue temi nyugü hile nyu le tseo nle a-phin rüchün hü nla?

⁴Temi hile kehen teshe nme hontse, a-keyhun jon le kengü hontse tinla hünyo.

⁵O Npugü, n tsang khinshe shüo tsenryü lo; kazüthun dan kesü shü tsüle khu chwiryü ti.

⁶Tsangkekechwe nipe anyugun hü kezen la lo; n tholevü tsi kvu shüo anyugun no kehü tinla lo.

⁷Tesoge bin-o n ben keta pe zü kentsun ki a sü shwilo lo a kenishü ta; tesin dan kekvu nyu a kenishü ta,

⁸tsüdan le ketsin zo hü kemvu, lo nkuo swen hü.

⁹O Sunggigü, ale lü keshün thyü pe nki shüti; harp ron tseryü kebin sen-o lüthyü pe nki shüti.

¹⁰Kvu kelo pe raja dan tsü kehü gü nle n gogü David kenishü hü.

¹¹A shwikerüchün nyu rigwa kemvu nyu a kenishü ta; tesin dan kekvunyu akhishwi shüta, tsüdan le ketsin zo hümvu, lo nkuo swen hü.

¹²Agun nyenyu peche dan no a selo kanyu sen kechün hontse, agun nyugi dan no raja kakhwün nyu ka gwün kezegwa kebin kachon dan hontse lo nda.

¹³Agun süsen nyu shye kechacha kethyü no kesü thyülo. Agun lowki tanyü no yie yie nche zen lo nda.

¹⁴Agun thugu dan no nmhela nmvue n chekecha la nyao chvükenye salo nda. Agun tson dan nyu rhokedyü khwenlü nme nyülo nya nda.

¹⁵Jochü tsühontse kethyü le a-ge tsü keryü nyu le henkegwa tsin; Npugü pe a Sunggigü kethyü senye le henkegwa tsin!