Read Southern Rengma Naga LÜHIN 145 Bible Online

LÜHIN 145 - Southern Rengma Naga bible

LÜHIN 145

¹A Sunggigü lo raja gü, ale n zan zo nso ti; lo kethonthen n zan shwen hü ti.

²Khenyütsen ale chenkeno pe n tsü ti; lo kethonthen nzan shwen hü ti.

³Npugü le gon, lo a-shwen sa zü, lo a-keda tsü sha ti loho.

⁴shenhe mele ntho dan shwen gü kecha güti ti, lo anyugun le n tho kekvu rüla zo hüti.

⁵Anyugun le n zan kechwi terün rüla zoti; lo ntho ndun kethyü dan ale rüchün ntsun hüti.

⁶Temi dan le n tho kekvu rüla zoti, lo ale n keda rüla zo pe me hiti.

⁷Mele n kegwa kesü kela kethyü rüla zoti tson-o n kemitsin rüla zo lüthyü tetso hüti.

⁸Npugü le me so lo njün hü, anyunta whütse hü mvu lo me sozin kehü pe a-sü pfü hü.

⁹Npugü le temi aphu ge a-jvü gwa hü, lo a-shwikenjün le ale thyü keshü aphu so ge bin hü nyo.

¹⁰O Npugü, nle nyhun keshü dan aphu chenkeno pe n tsüti, lo n temi kenshü nyu aphu n shwen ti.

¹¹Anyugun le n keda zankechwi rüla zoti, lo n kekvu zoti,

¹²tson-o temi nmeme tse no n tho kekvu dan lo n keda zankechwi kethyü shalo ti.

¹³N rajaphen le kethonthen bin hü, lo n raja le shenhe aphu bin ti. Npugü le a-jo aphu nyu ketsin thyü hü, lo a-tho aphu nyu shwikenjün le bin.

¹⁴Npugü le chetsü kejü nyu aphu nmhu zen hü; lo nkhünrün kela nyu aphu süso shü hünyo.

¹⁵Rhün kebin aphu n nri bin hü, lo nle gwünkho toka anyugun chvü pe tsü hünyo.

¹⁶Nle nben shweshüo, rhün kehü lihie no tyünyü kebin then pe tsü hünyo.

¹⁷Npugü le a-tson aphu nyu njü, lo a-tho aphu nyu shwikenjün le bin.

¹⁸Npugü le a-ko kehü nyu aphu, ketsin nyu a-ko kehü nyu aphu kho nni hü.

¹⁹A-le a-nshvu kehü nyu aphu sen mvulo keshvu khipe tsü hü; anyugun kenra khwenyüo anyu kenishü hü.

²⁰Npugü le a-so kehü nyu aphu ntsen hü, ai a-le serikemvu nyu aphu nkela ti.

²¹Ale azintse Npugü shwenhü ti, a-le nyhun keshü dan aphu no kethonthen a zan kenshün shwenlo.