Read Southern Rengma Naga LÜHIN 147 Bible Online

LÜHIN 147 - Southern Rengma Naga bible

LÜHIN 147

¹Npugü shwen! Lü thyü pe ngun Sunggigü keshwen le gwa; a-keshwen tsüle nkenyü lo a-zü.

²Npugü le Jerusalem thyü nso nishü; a-le sin rünyi gü ki hü tin kela Israel dan fü kequen nishü.

³A-le nyunkenjün thyü kehü nyu thyü nbwen shü lo anyugun tejün shvu phin shü.

⁴A-le Shenyü dikho no bin tiyo rhilo, lo tsü aphu zan thoshü.

⁵Ngun Npugü le gon lo kvusa; a-tha kesha le a-keni ndi.

⁶Npugü le serikemvu nyu süshe pe kazü nyu shü lahü lo tsenyo kehü gü penso shü hünyo.

⁷Chenkeno lüthyü pe Npugü ki shülo; lyre sen-o lüthyü kegwa thyü pe ngun Sunggigü ki shülo.

⁸A-le nmha no tsang je shü; kazü genyu tsangkenri nda shü lo tehen no rincho dan ge yhun shü hü.

⁹A-le tehen thyü lo tegvü dan le khun keshü ka tsüdan chvü pe tsü hünyo.

¹⁰A-shekerhün le keru kekvu dan genyu mvu, nmvue a-kenyü le shüpahü kepeche dan genyu mvu;

¹¹ai Npugü le senyu le a-nshvu lo a-le sozin kehü tenyen bin hüyo tsünyu shwi a-kenyü hünyo.

¹²O Jerusalem, Npugü shwen! O Zion, n Sunggigü shwenlo!

¹³A-le n khinrun kakhin thyü n koshü; a-le jochü pe n nyenyu dan tsüshü.

¹⁴A-le n kazü rhi ki gwaketho thyüshü; a-le thoshye kegwa tsin pe nkesü thyüshü.

¹⁵A-le ahza pe kazü tsüshü; a-le nyu zo yo tsü thyü whütse lahü.

¹⁶A-le khütso süren pe thyühüphi hontse shü a-le cheren kezen pe jonbü hontse shü.

¹⁷A-le a-tegwün shwepe tsotyünyu hontse shü; segü le a-kekun nyu sun bin logwa tila!

¹⁸A-le a-jo nishüo tsüdan no zun la; a-le tsang no nbu shüo, zü tsun la.

¹⁹A-le a-jo pe Jakob tsüshü, a-senkethyü lo a-tejvü dan pe Israel tesha shü.

²⁰A-le senye kecha nme ka hihontse thyü shümvu; anyugun le a-tejvü dan shamvu. Npugü shwen!