Read Southern Rengma Naga LÜHIN 148 Bible Online

LÜHIN 148 - Southern Rengma Naga bible

LÜHIN 148

¹Npugü shwen! Tsangge Npugü shwenlo, hagun teso ketetso ki yhun kehü dan.

²A-shwenlo, tsanggelonyu aphu, a-shwenlo, tsangge a-rihü dan aphu.

³A-shwenlo, yhüko lo sheh; a-shwenlo, ben kehü Shenyü dan.

⁴A-shwenlo, tsang ketetso dan, lo tsang so ge kebin zü dan.

⁵Anyugun no Npugü zan shwenlo lo! Kechamvule a-le ahza hoshüo anyugun rhen keshü genyu;

⁶a-le kethonthen genyu anyugun thyüshü laso; a-le anyugun no nken tinla lo keho bin thyüpe anyugun tsü laso.

⁷Kazü nyu Npugü shwenlo, hagun züda kentsun lo züringü nyu aphu;

⁸mah lo tegwün, khütso lo chere, tsangkenbu terhi a-le ahza hokeshü thyü zen kehü gü.

⁹Kazüthun dan lo rincho aphu, terasha bin dan lo sedar bin aphu;

¹⁰tehenthyü lo senru aphu, npfü kehü dan lo nyekehü tegü dan.

¹¹Kazü raja dan lo temi aphu, rajanyu nyenyu lo kazü nyu kekvu kesen nyu aphu;

¹²ponyu lo lünyu kesin, püshünyu lo n tsennyue.

¹³Anyugun aphu no Npugü zan shwenlo lo! A-zankechwi le tsang lo kazü soki.

¹⁴A-le a-senye gü thyü nko shü, tsügenyu temi aphu a-shwen a-le sosa kehü Israel temi dan tsü. Npugü shwen!