Read Southern Rengma Naga LÜHIN 16 Bible Online

LÜHIN 16 - Southern Rengma Naga bible

LÜHIN 16

¹A ntsen lolo, O Sunggigü; nle a ntsen loti tse ale tenyen kebin genyu.

²Ale Npugü ka, “Nle a Npugü le; thakegwa aphu n kanyu chwiryü.”

³Npugü temi tenyen lo kekü dan le ditsüki gwala! A nyunkenyü tsin le anyugun zen kengü kethyü le.

⁴Tero kecha dan then kegü nyule nyugwakemvu senryü a-npvü a-gen shülo hünyo. Anyugun kershvu nyu tsü ale anyugun zen kerhün loho; ale anyugun tero dan rühvu loho.

⁵A kenya aphu tsüle nle, Npugü, lo nle ale senmvulo keshvu aphu pe atsü; a sidyü le nben ka bin nyo.

⁶Nle kenrun nyu pe aketsü dan le ditsüki ndun thyüla; tsüdan le ditsüki gwala!

⁷Ale Npugü shwen, kechamvule a-le atson tsin kehü genyu, lo kheje ki anyu le atsontsin hünyo.

⁸Npugü le akhoka kehü ale rüchün zin bin hünyo; a-le akhoka kehü genyu, ale thame kae nnu loho.

⁹Tsügenyu ale a-cheno lo a sherhün, lo a thyümin-e kenshvu ndi;

¹⁰Kechamvule nle kesi kekvu günyu a ntsen kelo genyu, lo nle sokehü gü khipe kesi kazü gü nyu shüla loha.

¹¹Nle kerhün tson tsin pe ahi ti; n kehü bin le shekerhün le sü, lo nle kethonthen ketegvü kethyü senryü atsü ti.