Read Southern Rengma Naga LÜHIN 17 Bible Online

LÜHIN 17 - Southern Rengma Naga bible

LÜHIN 17

¹A khwenyü shülo, O Npugü, nno kenjü gü thyüshü lotse hihü nle; nno a cheshü lotse n keko khwenyü shülo! Ale anyun ketsin thyüo hi kebin nyü shülo.

²Nle kenjü gü nyu ajün kera shülo, nyu gü le njü yo nle sha kebin genyu.

³Nle anyun sha. Nle khejenyu a kiryü; nle a kegwa keshvu aphu shwi lo gwakemvu nme a ge kebin hyulomvu.

⁴Ale thagwakemvu nme zomvu me kechanyu hontse; ale johokeshü zen hü lo kenke tson dan then mvu.

⁵Ale a-zintse n tson nyu tsonchü hü lo tsü gwünzü la hümvu.

⁶Ale nka hihü nle, O Sunggigü, nle a kehi kenishü kehü genyu; tson-o rani akipon ryüo ajo dan nyü shülo.

⁷N keso ndunkethyü pe teshashüo agun kenishü ta; n denzin hülo a gun shwikerüchün nyu le agun nshwen loho.

⁸N yhütyü kentsen hontse a ntsenlo lo; nsekin hensin nyu a kebulo lo,

⁹A shwikerüchün nyu dan le a hunpfüo a when bin nyo;

¹⁰anyugun le me njün mvu lo ketekho jozo hünyo.

¹¹Anyugun le a hunpfüo, ale lihizin güe a süshela titse a seju bin nyo.

¹²Anyugun le shünyho hontse a sethü serüla nyüo akhwen bin nyo.

¹³Ryülo, Npugü! A shwikerüchün dan ntsun-o anyugun nye ki kvula lo! N zhethon pe shwikerüchün gü ben nyu a kenishü lo;

¹⁴keyhun higü nyu anyugun le nyu lonyü bin yo tsü aphu le kebin nyu dan ben nyu a kenishü lo; Nle anyugun genyu kequen kenjü kenjün kethyü dan tsü pe anyugun shaja thyü shülo; anyugun nyenyu genyu kesü kela kethyü lo peha nsen pe anyugun nyenyu dan nyenyue tsülo!

¹⁵Ai ale n hyu ti, kechamvule ale thame thyüzü njü kemvu genyu; lo ale chonsoryü lo, n mhundyü nyu shekerhün pe a kesü kela thyüti.