Read Southern Rengma Naga LÜHIN 18 Bible Online

LÜHIN 18 - Southern Rengma Naga bible

LÜHIN 18

¹Ale dihontse n sola, Npugü! Nle a keso güle.

²Npugü le a kesun gü; a-le a chwida kenko gü. Sunggigü le a kesun le, a-zen hülo ale kenshvu ndi. A-le gida hontse a sunlo hü; a-le ano khinloo a ntsen lo lahü.

³Ale Npugü koshü, lo a-le a shwikerüchün nyu ben nyu a ntsen hü. Npugü shwen!

⁴Kesi kenshvu le a hun kenthün lola; kenke zükentyü le a so henla.

⁵Kesi kenshvu gü le a hun bin, lo kesi güle a nsen bin.

⁶Ale thyü lo keshvu nyu bin-o Npugü koshü; ale a Sunggigü no a cheshü lo tse koshü. A-Kershvuka nyu a-le a khwen tselo; ale keche hi keshü khwen nyülo.

⁷Tsüselo kazü güle n dün lo nnu sola; kazüthun binjwen dan le nnun sola, kechamvule Sunggigü le a-nyunta kela genyu.

⁸A-hikon nyu mah le khu chwiryü, mah kenyü lo mahgi kenhon le a-mün nyu chwiryü.

⁹A-le tsang sürhen-o nmhu kezün pe a-phabin thyüo tsangryü.

¹⁰A-le cherub nme ge kü lo-o nyeshü; tson-o tsang kenhi sekin ge shwa gun ryü.

¹¹A-le kezün pe a-jepfü; nmhu kezün dan, zü no sü kethyü, pe a-hunpfü lola;

¹²A-mhundyü tsangkekechwe nyu tsü tegwün dan lo mah le nmhu kezün pfürhen chwiryü.

¹³Tsüselo Npugü le tsang no tsangsen shü; lo ketetso tsin gü khwen nyülo.

¹⁴A-le a-tholevü kvushüo a-shwikerüchün nyu hü kezen la; tsangkechwe pe tsüdan hü ketsü la.

¹⁵Züda güle sela tson-o kazü gü binkejwen dan le ndo la, Npugü, nle n shwikerüchünnyu dan rho, lo nnyuntao nra nhu keshü ka.

¹⁶Npugü le tesoge bin-o a-ben keta pe a sülo; a-le zü kentsun nyu a sü shwilo.

¹⁷A-le a shwikerüchün dan kekvunyu lo a kenrhinyu agenyu kvuri tsin kethyü dan ben nyu a kenishü.

¹⁸Ale kenjün thyü kebin ka, anyugun le a when ryü, ai Npugü le a ntsenlo la.

¹⁹A-le a che pe kenshvu bin nken shü; a-le a shwipe a-kenyü kethyü genyu a kenishü.

²⁰Npugü le achün thyüpe atsü ale nyule a-züyo tsü thyü keshü genyu; a-le jochü pe atsü kechamvule a kemu kendi genyu.

²¹Ale Npugü jvü gü zen hü; ale a Sunggigü khe-o tinla mvu.

²²Ale a-jvü aphu thyüzen hü; ale a-le ahza khi keshü nyümvula mvu.

²³A kemu kendi a-le shabin nyo, ale a-zükemvu kethyü nyu tsü a npvü a ntsenlo laso.

²⁴Tsügenyu a-le a chün thyüpe atsü ale nyule a-züyo tsü thyü kehü genyu, kechamvule ale thyüzü mvu tse kethyü a-le sha kebin genyu.

²⁵O Npugü, nle a-nyun ketsin thyü nso kehünyu soketsin thyü hü; lo nle gwapen kehünyu ge gwapen hü nyo.

²⁶Nle kenshün nyu ge nshün hü; ai senyu le serimvu hüyo tsünyu ntsun hünyo.

²⁷Nle tsenyo kehünyu kenishü hü, ai ketekho kehünyu thyü ketsenyo lahü nyo.

²⁸O Npugü, nle keben pe atsü; nle a kezün thyü nben shü.

²⁹Nle kekvu pe atsü shüo ano a shwikerüchün nyu hülo lo anyugun chwida nkenlo.

³⁰Sunggigü hile a-tho dan le ditsüki gwayo no! A-johokeshü dan le ketsin! A-tesun titse a-fü kehünyu aphu genyu ale gida hontse kethyü nme.

³¹Npugü nti Sunggigü le; Sunggigü nti ngun keno gü.

³²A thyü nko keshü gü tsüle Sunggigü, a-le a tsonthyü pe kenshvu no ndi la.

³³A-le apha thyü pe thyüzhe pha hontse shü; a-le a ntsen pe kazüthun kenshvu kendi nyushü.

³⁴A-le terikethyü teda pe a senthyü shü, tson-o ano levü kenkotsin gü sen shalo nrün genyu.

³⁵O Npugü, nle a ntsen lo lo a kenishü; nle a nucha pe ano gon lo, lo n kekvu le a ntsen lo.

³⁶A tenlo la nrün ka nle a ntsenlo, tson-o ale chela mvu.

³⁷Ale a shwikerüchün nyu hüo anyugun tenlo; ale anyugun nkela kemvu then khela mvu.

³⁸Ale anyugun vüshe la, tson-o anyugun le rani solo mvula; anyugun le a jonha lao a mhundyü nyu chela.

³⁹Nle teri genyu kekvu pe atsü lo a shwikerüchün nyu so kvukelo khishü.

⁴⁰Nle a shwikerüchün nyu thyü pe no a mhundyü tinla; senyu le a nrhi hüyo ano tsünyu nkela.

⁴¹Anyugun le nrao keche hi, ai temi nme anyugun kenishü mvu; anyugun le Npugü ko, ai a-le anyugun kehi kenishü mvu.

⁴²Ale anyugun boren la, tson-o anyugun le tsangkenbu le whünsen tinla kehü kenphü hontse la. Ale anyugun khipe tsonda nyu kenbe hontse kedü la.

⁴³Temi serikemvu nyu ju ben nyu nle a kenishü lo a thyü pe ano tsipwen dan so keda thyüshü; ale shahü kemvu temi dan no ntsonka we a lothyü bin.

⁴⁴Tesin dan no a mhundyü nyu nkhün-o a kelu; anyugun le akhwen nyülo ntsin ajo zen.

⁴⁵Anyun kepeche ndi lao anyu chwidanyu nsü ndün chwiryü.

⁴⁶Npugü le rhün hü nyon! A keno gü shwe le! A kenikeshü gü Sunggigü keda rüla pe zoshü lo.

⁴⁷A no a shwikerüchün nyu so kvukelo a-le khipe atsüshü; a-le tsipwen dan süshe pe a hensin shüshü

⁴⁸lo a kenrhinyu ben nyu a kenishü. O Npugü, nle ano a shwikerüchün nyu so kvukelo khi pe atsü lo temi gwakemvu nyu ben nyu a ntsen lo.

⁴⁹Tsügenyu ale tsipwen dan dan nyu nshwen ti; ale lüthyüo nshwe ti.

⁵⁰Sunggigü le kvukelo keda pe a-raja gü tsüshü; a-le kejü kelo gü David lo a-tsipwen dan kethonthen so zin hü nrün tsin shü.