Read Southern Rengma Naga LÜHIN 19 Bible Online

LÜHIN 19 - Southern Rengma Naga bible

LÜHIN 19

¹Tsang le dihontse Sunggigü zankechwi tsin tsentsü shüla! Lo a-le thyükeshü a-bentho dan tsin shünshvu shü bin nla!

²Khenyüme jon le tsüsigü ka zoshü; khejeme le tsüsigü ka zonishü.

³Nra n mvue jo zomvu, tha khwen nme nyülo mvu;

⁴ai a-nyugun khwen le kazü aphu nyu chwila lo kazü keni kie nyülo la. Sunggigü le yhüko genyu tsangge ka nme thyüshü;

⁵tsüle shekerhün thyü kebin Shenhünyu nme hontse lonyü chwiryü, kecho kehünyu nme le tin kehü nyü ho kebin hontse.

⁶Tsüle tsang keni peha zin chwiryüo pfüthü sen-o kechazin gun la. Tha nme a-kenyün nyu tsü kebu loho.

⁷Npugü tejvü güle gwapen; tsüle kekvu keshün khishü hü. Npugü johokeshü danle tenyen lo kü, tsüle thakesha khipe thakesha kerho nyu tsü shü hü.

⁸Npugü tejvü dan le njü, lo tsü thyüzen kehünyu le henkegwa nyu. Npugü johokeshü dan le nshün lo tsüle n yhü thyü nben shü hü.

⁹Npugü kershvu le gwa; tsüle kethonthen tsü hontse hüti. Npugü le me jün kekera le njü; tsüle a-zintse nshün.

¹⁰Suna kegwatsin nyeki tsüdan tsü tepen kvu zü; tsüle khuzü kenshün tsin nyeki n nyü kvu.

¹¹Tsüdan le thakesha khipe n go a higü tsüshü; ale tsüdan thyüzen kehü genyu a chün kegwa hyulo.

¹²Temi nme a-npvü a-thyü kezü dan hyulo ho; Npugü, kekebu ki kezü kemu dan nyu tsü a kenishü ta!

¹³Shweron thyü kemu thyüla lo kegwa nyue a ntsenlo ta; tsüdan no a-so gon la nyalo. Tsonlo yatselo ale gwapen loti lo kemu gwakemvu tsü thyümvu loti.

¹⁴A jo dan lo a kerüchün dan no nle lolo kekü thyülo nda; O Npugü, a keno gü lo a rhinhi kelo gü!