Read Southern Rengma Naga LÜHIN 21 Bible Online

LÜHIN 21 - Southern Rengma Naga bible

LÜHIN 21

¹Raja güle a-sherhün bin nyo, O Npugü, nle kenkokenkin pe a-tsü keshü genyu; a-le a-kenyü bin nyo nle a-thyü pe a-no kvukelo genyu.

²A-le nnyü kebin gü nle pe a-tsü shü; Nle a-kehi thyüpe a-tsü.

³Nle jochü keda sen a-kiryü lo suna raja perün pe a-pe rün shü.

⁴A-le nka keyhun hishü, lo nle tsü pe a-tsü shü, tsüle yhun kethon lo kethonthen bin nrün.

⁵A-zankechwi le gon nle a-che keshü genyu; nle zankechwi lo raja kethyü pe a-tsü shü.

⁶N jochü le kethonthen a-zen hü, lo nle kehü shekerhün pe a-kesü thyüshü.

⁷Raja gü le kekvutsin Npugü tenyen hü; lo Npugü le sozin kehü genyu a-le a-zintse kenshvu kendinyu bin hü.

⁸Raja gü le a-shwikerüchün nyu aphu tenlo lati; a-le a-kenrhinyu nmeme tse tenkülo lati.

⁹A-le chwiryü lo mah kenyü hontse tsüdan nke kü lati. Npugü le a-nyun kenta nyu anyugun nyilo lati, lo mah le anyugun ro lati.

¹⁰Anyugun tsipwen nme-e no kazü nyu bin loho; raja güle anyugun aphu dushvu lati.

¹¹Anyugun le a-ntsun-o thagwa kemvu rhiti, ai anyugun le kvu loho.

¹²A-le a-levü kvupe anyugun shwen lo anyugun no ranio kehü tinla ti.

¹³A gun le nshwen hü nle, O Npugü, n kekvu keda genyu! A gun le lü thyüpe n kekvu shwen hüti.