Read Southern Rengma Naga LÜHIN 22 Bible Online

LÜHIN 22 - Southern Rengma Naga bible

LÜHIN 22

¹A Sunggigü, A Sunggigü, nle nyuthyüo a khela ola? Ale kenjünthyü sao keche hi ai tsüle ryümvu.

²Ale nhenyu nko, a Sunggigü, ai nle a jo kenishü mvu. Ale kheje nyu n ko, ai kerüyü hyulo mvu.

³Ai nle kenshün gü, rajakhün ge kebin Israel nyule shwen kehü güle.

⁴A gun pvübon nyu dan le n tenyen hü; anyugun le n tenyen hü, lo nle anyugun kenishü hü.

⁵Anyugun le n ko keshü ka nle anyugun kenishü; anyugun le n tenyen hü lo anyugun le rünyun mvu kela thyü mvu.

⁶Ai a we temi mvu laso; ale ntse nme hontse, me no shwi ntsü lo temi no a nshwe nyhün laso!

⁷A kehyunyu aphu a shwinyü; a-yi nshü pe ahi lo a-pe pvü kezen.

⁸Tson-o anyugun le, “Nle Npugü tenyen kehü le,” “Nyuthyüo a-le n kenishü mvu ola? Npugü le n shwipe a-kenyü hü yatselo, a-le nyuthyüo n cheshü mvu ola?”

⁹A jvü ginyu a ntsen keryü gü tsüle nle, lo ale nyuhonyu thyü kehü ka nle a keni ryü.

¹⁰A nnyun lo nye kanyu ale n tenyen gun ryü, lo nle a-zintse a Sunggigü thyü hü.

¹¹A zen nithenla nyalo! kenjün kethyü le akhoka bin nyo, lo a keche mi nme ndi.

¹²Shwikerüchün nyu kechon le methu tse dan hontse a hunpfü bin nyo; anyugun le a-hun kenthün bin nyo, Bashan kazü nyu methu tse kensho dan hontse.

¹³Anyugun le shünyho dan hontse anyugun münkvu pfüo a sethü-serü la nyüo nho bin nyo.

¹⁴A kekvu ndi laso, zü ja pe kazünyu keshü hontse tsüle tin laso. A ru dan aphu a-kekeren nyu bin mvu laso; anyun pfü kemvu hontse laso.

¹⁵A tero le sin pe keshvula hontse laso, lo ayi le a ngi nku laso. Nle a khepe sila lotse nnyo kenphü nyu shü laso.

¹⁶Temi serikemvu logwa nme le a hunpfü bin; tehi dan me hontse anyugun le akho nni bin; anyugun le a ben hvu lo a pha hvu jenphe la.

¹⁷Aru aphu hyulo gwala. A shwikerüchün nyu danle a nri tserü bin.

¹⁸Anyugun le a phinya pe anyugun kenjün lola lo aminrün pe henkeshwi thyüla.

¹⁹O Npugü, a zen nithen la nyalo! Whütse ryü a chye shülo!

²⁰Zhethon gü nyu a kenishü; tehi hidan dan ka a keyhun kenishü.

²¹Shünyho hidan mün nyu a ntsen lo; Tehen thutse kensho hidan mhundyü nyu ale thame thyü keloi mvuso.

²²Nle nyuthyü shüyo ale pe a temi dan ka zoti; anyugun kehun nyu ale n shwenti.

²³“A-shwenlo lo, hagun Npugü go nyu dan! A rühvulo, hagun Jakob tsipwen dan! A rüshvulo, hagun Israel temi dan!

²⁴A-le kendinyu ntsüla nmvue anyugun kenjün kethyü nmhin la hümvu; a-le anyugun shwimvuo rani lamvu, ai anyugun le keche hi keshü ka a-le anyu kehi thyüshü.”

²⁵Nle thyü keshü tho genyu ale danda mhundyü nyu n shwen ti; n rüshvu kehünyu dan mhundyü nyu ale joshükenjü kershvu thyüpe n rüshvuti.

²⁶Kendi gü no tyükenyü kho tyüti; Npugü ki keryü nyu no a-shwen ti. Anyugun no kethonthen gwakenye lo nda le!

²⁷Tsipwen aphu le Npugü rüchün ti. Kazü aphunyu temi le Npugü ki rani ryüti; lo senye aphu a-rüshvu ti.

²⁸Npugü le raja, lo a-le tsipwen dan so gon bin nyo.

²⁹Ketekho kehü temi dan aphu nkhün tsügü a-rüshvu ti; temi aphu a-mhundyü nyu nkhün kü ti.

³⁰Siki shenhe dan le a-lothyü ti; temi le Npugü rüla zope shenhe ryü kejü gü ka zoti.

³¹“Npugü le a-temi keni keshü,” rüla pe temi nnyu ryü nrün dan ka zoti.