Read Southern Rengma Naga LÜHIN 25 Bible Online

LÜHIN 25 - Southern Rengma Naga bible

LÜHIN 25

¹O Npugü, ale nka hi bin nle;

²a Sunggigü ale ntenyen hü nle. A shwikerüchün nyu no a sokvula nya ai keja kepfü nyu a kenishü ta.

³N tenyen kehü nyu le meno a nyeki kvu la hümvu, ai whütse n ntsun kehü nyu le tson lahü.

⁴N tson dan pe a senthyü shülo, O Npugü; tsüdan pe ano shalo ta.

⁵A no n ketsin gü then-o yhunlo nrün genyu a senthyü shüta, kechamvule nle a Sunggigü, a kenishü kehü gü le. Ale a-zintse n tenyen hü nle.

⁶O Npugü, nle hi mhundyü pe a tesha keshü nle so lo shwi njün zin kehü gütsü rüchün shülo.

⁷A selo ka kemu lo thyükezü dan jü pe atsülo. Nle sozin kehü lo n kegwanyu, a rüchün shülo, Npugü!

⁸Npugü le gwa lo njü, a-le then mvulo keshvu tson gü zope kemu nyu dan senthyü hü.

⁹A-le tsenyo kehünyu tson tsin pe tson ketsin günyu shü hü lo a-kendo pe tsü dan senthyü shü hü.

¹⁰Tenyenlo kekü lo keso sen-o a-zen kejozenkelo lo a-johokeshü thyü zen kehünyu aphu tsontsin hü nyo.

¹¹Nle zo pe bin kenjü hontse, Npugü a kemu dan jüshü ta, tsüle chonri kela genyu.

¹²Senyu le Npugü jo thyü zen hüyo tsünyu le Npugü ka anyugun le then mvulo keshvu tson gü shalo ti.

¹³Anyugun le a-zintse gwa kenye loti, lo anyugun nyenyu le kazü gü gwen loti.

¹⁴Npugü le a-jo thyü zen kehünyu pvü gü lo a-le tsünyu zen-o a-johokeshü thyü ketse ni hü nyo.

¹⁵Ale gwünkho aphu ka Npugü ki keche nri hü nyo, lo a-le kenshvu nyu a kenishü hü.

¹⁶Rani aki ryülo, Npugü, lo a shwi njün shüta, kechamvule ale a npvü lo kvumvu.

¹⁷A nyun kenjün thyü kebin thyü nben shüta lo ale kenjün thyü kebin aphu nyu a kenishü ta.

¹⁸A shekese lo a kenjün kethyü rüchün shüta tson-o a kemu aphu jü shülo.

¹⁹A shwikerüchün nyu dikho le binyo nri shüta; anyugun le ditsü laki a nrhi yo rüchün shü.

²⁰A rikhun lo a kenishü ta; meno a nyeki kvula lo kegwa nyu a ntsen lo. A kenishülo tse ale nki ryü bin nle.

²¹Kegwa lo kentsen keseri no a ntsen bin lo nda, kechamvule ale n tenyen kehü genyu.

²²O Sunggigü, n temi Israel kenjün kethyü aphu nyu anyugun keni shüta!