Read Southern Rengma Naga LÜHIN 27 Bible Online

LÜHIN 27 - Southern Rengma Naga bible

LÜHIN 27

¹Npugü le a keben lo a kenikelo gü; ale nme nshvu loho. Npugü le kenshvu aphu nyu a ntsen hü nyo; ale nshvu lo ho.

²Temi gwakemvu nyu le a when lo adushvu lati tse keso ka, anyugun pha nsüo chela ti.

³Rihü dan le ahun kenthün pfü bin yatse-e, Ale nshvu loho; a shwikerüchün nyu le a when bin-e, tson-e ale Sunggigü tenyen ti.

⁴Ale Npugü ka thakon me hihü nyo; ale mvulo shvu kebin le kon me nti: a rhünthen Npugü ka nyu yhun-o, a-kegwa rüchün adunthyü, lo a-tson ketsin fühü nyüle.

⁵Kenjün kethyü gwünkho ka ale asunlo lati; a-le a-Kershvuka nyu a ntsenlo lati lo tsonye ketetso nme ge a kenilo lati.

⁶Tsü genyu ale a hunpfü kebin a shwikerüchün so kvulo ti. Ale shekerhün thyü nra sen-o a-Kershvuka nyu tha khipe a-rüshvu ti; ale lüthyüti, ale Npugü shweti.

⁷Ale nko keshü ka, a khwen nyü shüta, Npugü! a shwi njün-o a kehi kenishü ta!

⁸Nle, “Ryü arüshvulo,” tson keshü ka, ale njo kenishü, “Ale ryüti, Npugü;

⁹a kebu tinla nyalo!” A ge nnyunta lanya; n gogü hünila nya. Nle ache ryü; a khe nya, a hoshüla nyata, O Sunggigü, a kenikelo gü.

¹⁰A pvü lo a jvü le a khela logwa, ai Npugü le a nucha loti.

¹¹Npugü, nle ano nyu thyünyü binyo pe a senthyü shülo, lo a tsontsin pe kenshvu kendi nyu shüta, kechamvule a shwikerüchün nyu kechon le kehü genyu.

¹²A khepe a shwikerüchün nyu tsüla nyata, anyugun le kenku nyu a ketsun bin nyo.

¹³Ale ntso ntsenyü keyhun nyu hi rhün hüo Npugü kegwa hyuti tse shabin nyo.

¹⁴Npugü tenyen bin lo. Ketenyen no bin lo, shese nya. Npugü tenyen bin lo.