Read Southern Rengma Naga LÜHIN 28 Bible Online

LÜHIN 28 - Southern Rengma Naga bible

LÜHIN 28

¹O Npugü, a no kekhin gü, ale nko hü nle. A khwenyü shüta! Nle a kehi kenishü kemvu we, ale kesi bin ki gü kela nyu dan nyu hü lati.

²Ale nka keche hio a ben shwen pe n Kershvuka kenshün gü denzin keshü ka a khwenyü shüta.

³A lo pe serikemvu nyu temi gwakemvu thyü kehü nyu dan a-mün ka jokegwa zo-o a nyunki me shwi ntsü kehü nyu sin-o nmu lanyalo.

⁴Anyugun le nyuthyü shüyo tsü shaja pe anyu gun tsülo, kechamvule anyugun le thyüzü kemvu thyü kela genyu. Anyugun tho dan aphu genyu shaja pe tsülo; anyugun le nyu hyulo züyo pe tsülo.

⁵Anyugun le Npugü le nyu tho thyü shüyo nmvue a-le nyuthyü shüyo rüchün shü hümvu; tsügenyu a-le shaja pe anyugun tsüti lo kethonthen anyugun nkela ti.

⁶Npugü shwe shülo; ale keche kehi khwe a-le nyüshü.

⁷Npugü le a kentsen lo a keno gü; ale a-tenyen hü. A-le keche pe atsü hü lo a no akenyü lohü; ale shekerhün lüthyü pe a-shwe hü.

⁸Npugü le a-temi dan ntsen hü; a-le kejü kelo raja gü ntsen lo kenishü hü.

⁹N temi dan kenishü lo, Npugü, jochü pe n temi tsülo. Nle anyugun kekhwe gü thyü, lo kethonthen anyugun nucha lolo.