Read Southern Rengma Naga LÜHIN 30 Bible Online

LÜHIN 30 - Southern Rengma Naga bible

LÜHIN 30

¹Ale nshwen hü nle, Npugü, nle akeni keshü genyu lo a shwikerüchün nyu no anyugun sherhün la kemvu genyu.

²O Npugü, a Sunggigü, ale nra-o nka keche hi, lo nle a thyü kesherhün shü;

³nle sika nyu a ntsen nilo. Ale kentsun ki yü jü la, ai nle a thyü nrhün nishü.

⁴Kenshün nyu dan aphu, lü thyüpe Npugü shwenlo! Kenshün güle nyu thyü shüyo rüchün shü, lo chenkeno pe a-tsülo!

⁵A-nyunkenta le keshanyu jaka, a-kegwa le n kerhünthen. Khejenyu yhüphu che bin logwa, ai lonyü gü shekerhün le ryü hü.

⁶Ale kenshvu ndi lo a npvü a nthon-o, “Mele a nyeki kvula loho.”

⁷Npugü, nle agenyu gwari; nle kazüthun chwida nme hontse a sun hü. Ai tsontseo nle a kebu tinla lo ale nshvu la.

⁸Ale nko hü nle, Npugü; ale nka keche hibin nle:

⁹“A kesinyu nle nyu kechwi hyulo mon? Ale sika nyu yükela genyu nyu chwi lo mon? Kesinyu le n shwen lo gwa ti ole? Anyugun le n kegwa rüla jün zo shülo gwa ti ole?

¹⁰Npugü, a khwenyü shü, lo a shwi njün shüta! A cheshülo, Npugü!”

¹¹Nle a nyun gwakemvu thyü kelu pe shekerhün da kethyü nme thyüshü; nle a nyun gwakemvu sen tinla lo shekerhün pe a hunkenthün shü.

¹²Tsügenyu ale ntsema bin loho; ale lüthyü n shwen ti. Npugü, nle a Sunggigü le, ale kethonthen chenkeno pe ntsü ti.