Read Southern Rengma Naga LÜHIN 31 Bible Online

LÜHIN 31 - Southern Rengma Naga bible

LÜHIN 31

¹Npugü, n no a ntsen lolo tse ale nki ryü le; thame kae meno a nyekvu lanya. Nle kentsen Sunggigü; ale nka hi hü nle, a kenishü ta!

²A kehi nyü shüta! ntsoka a kenishü ta! A kesun thyüo a no khinlo; a chwida thyüo a kenishü ta.

³Nle a keno lo a chwida le; nle zokejün hontse a tson tsin lo ri lota.

⁴A nsen kebin nyu tsü a ntsen shülo; Kenshvu nyu a sun lota.

⁵Ale a khipe n ben nyu shü laso. Npugü nle a ntsenlo ti; nle joketsin kesen Sunggigü le.

⁶Ketsin kemvu tero rüshvu kehünyu nle tsünyu ntsü hü, ai a we n tenyen hü nyo.

⁷Nle sozin kehü genyu ale a kenyü lo a sherhün ti. Nle a kenjün kethyü hyu; lo a rhokedyü sha bin nyo.

⁸Nle a shwikerüchün nyu no a tenlo lamvu; nle a no a kenda thyü a gü kenyü bin ka gülo hü.

⁹Npugü, a shwinjün shüta, ale thyülo keshvu nyu kebin genyu; chü loho laso; ale kvumvu shü laso.

¹⁰A keyhun le nyun gwakemvu nyu nke bu güjü laso, lo kechü le a keyhun thyü nzü laso. A kenjün kethyü aphu genyu ale kvumvu laso; arue nke bu gü jü laso.

¹¹A shwikerüchün nyu aphu, lo a kazon nyu jue, a shwi ntsü laso; a kesha nyu dan le a shwi nshvu; anyugun le tson nyu a hyu shü, lo kehü tin lahü.

¹²Kesi nyu nme hontse mele a nmhin laso; ale thakhin ren nme hontse laso.

¹³Shwikerüchün nyu kechon le a ge zo kebin nyülo; kenshvu le a temhun aphu hun bin nyo. Anyugun le a ntsun-o a dushvula ti tse teda rhi bin nyo.

¹⁴Ai Npugü, a we n tenyen hü; n le a Sunggigü le.

¹⁵Ale a-zintse n ben nyu bin nyo; a shwikerüchün, a nthyünyü kehünyu ben nyu a kenishü ta.

¹⁶Shwikenjün nyu ngo gü nri shülo; nle sozin kehü nyu a kenishü ta.

¹⁷Npugü, ale nko hü nle; ano keja pfüla nyalo. Serikemvu dan no keja pfüla lo; anyugun no kesi kazü nyu matse tinla lo.

¹⁸Kenku nyu da kemitsin nyu shwinyü kehü, ketekho lo metsin kehünyu aphu no matse lalo.

¹⁹Thakegwa dan nle rühvu kehünyu genyu ntsen pe bin kenjü dan le ditsülaki ndunthyü la! Nle dihontse gwa lo n tenyen kehü ntsen pe kenshvu kendi nyu shü hüyo temi aphu, sha.

²⁰Nle kehü kenshvu kendi nyu bin-o temi le thagwakemvu nda kebin nyu anyugun kebulo ti; shwikerüchün nyu le anyugun kenshwen nyu nhensin ka nle anyugun kebulo ti.

²¹Npugü shwen! Mele a hunkenthün pfüo a when kebin ka a-le a keso pe hi keshü ditsüki ndun thyü la!

²²A-le a-mhundyü nyu a hü pe shwenla se ado tse ale nshvu lo rüchün la. Ai a-le a khwenyü lola, ale keche hio a ko keshü ka.

²³Npugü so lo, a-temi kenshün nyu aphu. Npugü le ketsinnyu yhun kehünyu ntsen lola hü nyo, ai shaja pe ketekho nyu tsü hü anyugun le tsü hyu zü.

²⁴Nko binlo, peche lo, hagun Npugü nrin bin kehünyu aphu.