Read Southern Rengma Naga LÜHIN 33 Bible Online

LÜHIN 33 - Southern Rengma Naga bible

LÜHIN 33

¹Kemitsin nyu aphu, Npugü le nyuthyü shüyo tsügenyu shekerhün thyü nra senlo; hagun a-jozen kehü nyu aphu a-shwen lo.

²Harps sen-o chenkeno pe Npugü tsülo, a-rhü kebin lükhin sen lüthyü pe a-kishülo.

³Lü keshün nme thyüpe a-kishü, Harp sen shasa, lo shekerhün genyu nra sen shü!

⁴Npugü jodan le ketsin lo a-thodan aphu tenyen lokü.

⁵Npugü le kemitsin lo ketsin tsüle a-kenyü; a-le sozin kehü le kazü gü sü bin nyo.

⁶Npugü le a jonyu tsang dan thyulo, a-le zo keshü jo le yhüko, sheh, lo shenyü dan thyü shü.

⁷A-le züda aphu sükerhün la; lo züda kentsun dan kequen pe a-khin nyu shüla.

⁸Kazü aphu, Npugü nshvu lolo! Kazü temi aphu, a-rühvu lo!

⁹A-le jozo keshü ka kazü gü nyhun lo; a-jo nyu tha nmeme aphu chwiryü lo.

¹⁰Npugü tenyen kemvu tsipwen dan le tharhi kebin tsüpe a-kon kendi thyüla hü; a-le anyugun no rhikebin tsü thyülo mvula hü nyo.

¹¹Ai a-le rhikebin gü tsüle kethonthen bin hü; a-kerüchün dan tsüle nthenteyhün bin hünyon.

¹²Sunggigü no a-Npugü kethyü tsipwen gü le henkegwa tsin; a-le kejü pe a-hon thyü kelo temi danle henkegwa tsin!

¹³Npugü le tsangge bin-o nri bin lo a-le temi aphu hyu hü.

¹⁴A-le a-keda bin nyu bin-o kazünyu yhun kebin nyu aphu nri bin hünyo.

¹⁵A-le anyugun kerüchün aphu rhenshü hü lo anyugun le thyü kebin lihie shabin.

¹⁶Raja nme-e a-shüpahü kechon genyu kvulo hümvu; Shüpahü nyu nme-e a-kenko genyu kvulo hümvu.

¹⁷Kvulo nrün gen teri keru dan le a-kon ndi; anyugun nkosa kethyü tsüle anyugun kenilo ho.

¹⁸Npugü le senyu le a-rühvu hüyo tsünyu shwibin nyo. senyu le a-le sozin kehü tsü tenyen hüyo.

¹⁹A-le kesinyu tsüdan keyhun kenishü hü; chenda gwünkho nyu a-le tsüdan no rhünbin lo hünyo.

²⁰Agun kenrin le Npugü nyu bin; a-le agun gida lo agun keche gü.

²¹A-genyu agun kenyü hü; agun le a-zan kenshün gü tenyen kehü genyu.

²²Npugü, nle sozin kehü tsüno agun zen hüta, agun le n nrin bin kehü hontse.