Read Southern Rengma Naga LÜHIN 34 Bible Online

LÜHIN 34 - Southern Rengma Naga bible

LÜHIN 34

¹Ale a-zintse Npugü cheno hüti; ale a-shwen zin hüti.

²A-tho genyu ale a-shwenti; mele nshwe kehünyu aphu no nyülo lo sherhün lo nda!

³A zen kengüo Npugü keda rüla zoshülo; ngun kengüo a-zan shwen tinu!

⁴Ale Npugü ka hishülo a-le akehi nyü shü; kenshvu aphu nyu a-le a kenishü.

⁵Mele nshwe kehü nyule a-nrishüo anyu sherhün lohü; anyugun le thame kae shese la loho.

⁶Kechekendi nyu le a-ko shülo a-le anyugun khwen nyü shü; anyugun kenjün kethyü aphu nyu a-le anyu kenishü.

⁷Senyu le Npugü rühvu hüyo a-jolonyu le tsünyu rikhun lo kenshvu nyu anyugun ntsenlo lahü.

⁸Npugü le dihontse gwayo n npvü ntsin-o shalo lo. Npugü no a-ntsenlo kelanyu le henkegwa nyu.

⁹Npugü temi dan aphu, a-rühvulo; a-jo zen kehünyu le thame rhokedyü ndi.

¹⁰Shünyho dan ai a-chvü rhodyüo nnyon hü, ai senyu le Npugü jo zen hüyo tsünyu we tha kegwa rhodyü loho.

¹¹Ryülo, ntsenyu ju, a khwen nyülo, ale Npugü kerühvu jvü pe hagun senthyü shüti.

¹²Nle yhun pe nshekerhün thyü nyü bin le? Nle yhunthon lo nyunkenyü thyü nyü bin nle?

¹³Tson yatselo jogwakemvu kezo lo kenkunyu nkekhe nilo.

¹⁴Thagwakemvu nyu ranilo lo thakegwa thyülo; n nyun aphu sen-o nyun keben fülo.

¹⁵Npugü le kemitsin nyu nri bin hü lo anyugun kehi khwen nyü bin hünyo;

¹⁶ai a-le gwakemvu thyü kehünyu ntsun hü, tson-o anyugun le silalo, anyugun nmhin whütse lahü nyo.

¹⁷Kemitsin nyu le Npugü koshülo, a-le nyü shü hü; tson-o anyugun kenjün kethyü aphu nyu anyugun kenishü la hünyo.

¹⁸Npugü le anyun kenjün thyü kehü nyu kho n nihü; lo tharüchün pe adyü keyün kendi nyu kenishü hünyo.

¹⁹Temi kegwanyu kenjün kethyü le chonsa, ai Npugü le tsü aphu nyu a kenishü hü;

²⁰Npugü le a-ntsen shülo la hünyo; aru nme-e bosela mvu.

²¹Thagwakemvu le serikemvunyu boshvu lati; kemitsin nyu nrhi kehü nyu le nkela ti.

²²Npugü le a-temi kenishü ti; senyu le a-fü güyo tsünyu nrho shüti.