Read Southern Rengma Naga LÜHIN 35 Bible Online

LÜHIN 35 - Southern Rengma Naga bible

LÜHIN 35

¹Npugü, a nren kehü nyu nren shüta, lo azen kega kehünyu zen kega shüta!

²N gida lo terikanyü khilo-o ryü akenishü ta.

³N mi penso lo-o ahü kebin dan zen terithyü lo. Nle a kenilo titse aka zoshü ta.

⁴A dushvula ti tse ndo kebin dan nye kvulao no keja pfüla lo! A ntsun-o tharhi kehü dan no kevükeben lao rani lalo!

⁵Anyugun no tsengkenbu le shyebün whünsen kehü hontse Npugü jologü no anyugun hü sen tinla!

⁶Anyugun tson no zün lo keshwükerü Npugü jolo gü no anyugun vüshe kebin ka!

⁷A-kon kendi ka anyugun le a nsen shü a tenlo titse chwen tso.

⁸Ai anyugun le rüchün mvu kebin ka kenke le anyugun tenlo ti; anyugun npvü anyu sen ka minlo ti lo anyugun le kenke nyu che ti.

⁹Tson-o Npugü genyu ale akenyü ti; a-le a kenikeshü genyu ale a sherhün ti.

¹⁰Ale anyun aphu sen-o Npugü ka zoti, “N hontse kethyü nme ndi. Nle kekvunyu ben nyu kvukemvu nyu ntsenshü, lo me nshwe kehü nyu ben nyu kendinyu kenishü le.”

¹¹Temi gwakemvu nyu le ale shamvushü kethyü kemu zope a njü bin nyo.

¹²Ale kegwa thyüshülo anyugun le gwamvu pe a kethun, tsügenyu ale ashese laso.

¹³Ai awe anyugun le honyü lolo, ronphi ben; tyütsü mvu tse; kenjün thyü a pe pfü nkhün-o kehi thyü hü.

¹⁴Apvünyu nmvue a sikezen nyu nme genyu hontse, temi nme le ajvü chechü kebin hontse ale nkhün-o chechü hü.

¹⁵Ai ale kenjün thyü keloka, anyugun le shekerhün thyü ahunpfü lo-o akhipe keyü thyü; tesin dan le avü lo a nkhin.

¹⁶Phayhonyu nme pe keyüthyü kebin hontse, anyugun le a nrhio a shwinyü.

¹⁷Npügü, nle dithenlakhi, nri gwünzin bin tila? Anyugun le a when kebin nyu a ntsenlo ta; Shünyho hidan ben nyu a kenishü ta!

¹⁸Tson yatselo ale n temi dan le kehun kebin nyu ncheno shüti; ale anyugun aphu mhundyü nyu nshwen ti.

¹⁹Meno a nyeki kvulao a shwikerüchün, kenku nyudan tsü no agenyu a-sherhünla nya. Ano anyungwamvuo a-kon kendi ka a nrhi kebin dan no anyugun kenyüho kela thyüla nya.

²⁰Anyugun le kengü kegwa jozo hümvu; tson kethyü sunka nkuo kengü kegwa le a-kenyü kehü nyu ge zobin hünyo.

²¹Anyugun le a-nmu, nra sen-o, “Nle nyuthyü binyo agun le hyu laso!”

²²Ai O Npugü, nle hi hyu laso. Tsü genyu matsela nyalo, Npugü; nle nithenki hü tinla nyata!

²³O Npugü, soryü a nopen lolo; soryülo, a Sunggigü, tson-o ajün zoshüta.

²⁴O Npugü, nle kentsen kenjü gü, tsü genyu ale kemu ndile tse zoshwishü ta; a shwikerüchün nyu no agenyu a-shekerhün thyüla nyata.

²⁵Anyugun no anyu npvü, “Ngun le rüchün kebin hontse a-nyekvulo laso tsonla nyalo!”

²⁶Ale kenjünthyü kelo ka a-sherhün kehünyu no meno a-nyeki kvu shülo la-o kevükeben lalo; anyeki gwakvu le tse zo kehünyu dan no keja kepfü lo shwi kenyü thyü lalo.

²⁷A kenyü le kebin hyu shünyü kebin nyu no shekerhün thyü nra sen-o, “Npugü le ditsülaki gonla! A-gogü no kvukelo le a-le a-kenyü hü,” tsonlo.

²⁸Tson yatselo ale n kentsen kenjü rüla pe zoti, lo ale jon gwün nshwen hüti.