Read Southern Rengma Naga LÜHIN 37 Bible Online

LÜHIN 37 - Southern Rengma Naga bible

LÜHIN 37

¹Serikemvu nyu genyu n kevükeben nya; tha thyüzü kehünyu shwi pe n yhütyü kelu bin nya.

²Tehen le nko kela hontse anyugun hyumvu whütse lati; lo tehen le rügu kela hontse anyugun le silati.

³Npugü tenyen lo-o thakegwa thyülo; tsonlo yatselo kazü gü nyu kenshvu ndio yhun loti.

⁴Npugü nyu n shekerhün fülo, lo a-le n nyun le n nyü kebin gü khipe ntsüti.

⁵N npvü n khipe Npugü tsüshü; tson-o a-tenyenlo, lo a-le ncheshü ti;

⁶a-le n kemitsin no ben pe nhenyu yhüko hontse shüti.

⁷Npugü no thyüshü nrün genyu nyhen nhio khwen binlo; gwakenye kebin nyu nmvue gwakemvu nrio tsü thyülo kebin rüla rüchün pe nkevü keben nya.

⁸N kevü keben nmvue nyunta nya; tsüle kenjün kethyü nyu gü kejü gwünzin.

⁹Senyu le Npugü tenyen hüyo tsünyu le kazü gü senlo ti, ai serikemvunyu we hüpe shwenla ti.

¹⁰Thonmvutse serikemvu nyu hyu mvula ti; nle anyugun füti ai nle anyugun hyu loho;

¹¹ai tsenyo kehü gü le kazü gwenlo ti tson-o gwakenye lo nyun ben-o yhun ketegvü loti.

¹²Temi serikemvu gü le kegwa gü ntsun-o gwa kemvu rhi lo a-shwirüchün-o hüketa hü.

¹³Ai Npugü le temi serikemvunyu shwi nyü hü nyo, anyugun le whütse nke nrün a-le sha kebin genyu.

¹⁴Temi serikemvu nyu dan le kendi nyu lo rhokedyü nyu boshvula ti tseo anyugun zhethon tholo lo levü sügi lo, kenjü tho thyü kehünyu dushvula ti tseo;

¹⁵ai anyugun npvü anyugun zhethon le anyugun dushvu lati, lo anyugun levü dan boren lati.

¹⁶Temi kegwanyu kenya keshanyu kebin tsüle serikemvunyu kenya aphu nyeki a-min le bin nyo,

¹⁷Npugü le serikemvunyu kenko gü sen tinla nrün genyu, ai temi kegwanyu we ntsen lo lati.

¹⁸Npugü le senyu le a-jozen hüyo tsünyu nucha lola hünyo, lo kazü güle kethonthen anyugun hon thyüti.

¹⁹Gwünkho gwakemvu kae anyugun le kenjün thyü loho; chenda gwünkho kae anyugun le kechon le binti.

²⁰Ai serikemvu dan le sila ti; Npugü shwinyü kemvu dan le tehen nye hontse hyu mvula ti; anyugun le mah kekhu hontse hyu mvula ti.

²¹Temi serikemvu gü le tepulo ai kethun nihü mvu ai temi kegwa gü we nho sao tha pe metsü hünyo.

²²Npugü le jochü pe ketsünyu le kazü gü gwen lohü, ai a-le swentsü kelanyu hüshwi lati.

²³Npugü le temi nme tson tsin pe ano gü mvulo keshvu tsonnyu shühü lo a-kenyü thyü kehünyu ntsen bin hünyo.

²⁴Anyugun le chelae, tsünyu bin loho, Npugü le anyu keche pe no sola nrün genyu.

²⁵Ntsoka we ale kethennyu nmeso; ale gwünkho kethon yhun laso, ai ale Npugü le temi kegwanyu nme kheshü kela nmvue a-nyenyu le shvutyü kehü hyu shwimvu.

²⁶A-le me shwinjün-o a-zintse thape metsü, metepu lo a-tsipwen le jochü pfühü.

²⁷Gwakemvu nyu ranilo lo thakegwa thyülo, tson yatselo n tsipwen le a-zintse kazü nyu yhun loti;

²⁸kechamvule Npugü le nyu le njüyo tsüle a-kenyü lo a-temi joketsin kesen nyu khela hümvu. A-le kethonthen tsüdan ntsen bin hü, ai serikemvu nyu tsipwen we hüshwi lati.

²⁹Kemitsinnyu le kazü gü gwen loti lo kethonthen tsünyu yhunti.

³⁰Temi kegwanyu le thakesha jo zohü lo a-le a-zintse njü hünyo.

³¹A-le a-Sunggigü jvü gü tsü pe anyun nyu shü pfü hü lo thame kae tsünyu tin loho.

³²Temi serikemvu güle temi kegwa gü nri tseo a-dushvu kela ndo hünyo;

³³ai Npugü le a-khepe a-shwikerüchün gü kekvunyu shüla nmvue mele a-ketso ketsü kegun ka meno nmula loho.

³⁴N sidyü pe Npugü nyu shü lo a-johokeshü zenlo; a-le nrühvuo kazü güpe ntsüti, lo nle serikemvu nyu hüpe shwe kela hyuti.

³⁵Ale gwüngwa serikemvu kekvunyu nme sha; a-le Lebanon nyu sedar bin hontse temi aphu nye tetso;

³⁶ai kenkhin ki a le tsü nken gü laryü a-le tsünyu ndila; ale a-fü, ai a-hyulo mvula.

³⁷Temi kegwagü shalo, kemitsin gü rüla nye shü; temi bwenye tse kehü güle a-tsipwen le bin hü,

³⁸ai kemu nyu dan we nke shüla hü, lo anyugun tsipwen shope shwela hünyo.

³⁹Npugü le kemitsin nyu kenishü hü lo kenjün kethyü gwünkho ka anyugun ntsen lo hünyo.

⁴⁰A-le anyugun che lo kenishü hü; a-le serikemvu nyu ben nyu anyugun kenishü hünyo, a-nyu le a-no anyugun ntsen lo lo tse a-ki kegü genyu.