Read Southern Rengma Naga LÜHIN 38 Bible Online

LÜHIN 38 - Southern Rengma Naga bible

LÜHIN 38

¹O Npugü, n nyunkenta ka shaja pe atsü nya ta!

²Nle n levütsi dan pe ajün laso; nle a vüshe laso.

³N nyunkenta genyu, ale kenjün thyüsa bin laso; a kemu genyu a thyüzi kvumvu laso.

⁴A kemu nyu a nrheshvu güjü laso; tsüdan tsüle nsuri tsin-o pfülo keho khvu laso.

⁵A kepho genyu a kethyüshvu le tenbin laso.

⁶A boren pe nkhünrün laso; ale jongwün chü hünyo.

⁷A kerüka le a rope ale sigü jü laso.

⁸Ale kvumvu laso lo a boren boryü laso; thasenni rüchün pe akevüo anyun kenjün thyü laso.

⁹O Npugü, ale nyu nnyü binyo nle sha; a tha kerüchün khwen aphu nle nyü binnyo.

¹⁰A nyun thunthun tse, a kekvu ndi laso, ayhütyü le a-keben ndi laso.

¹¹A pvünyu lo a kajon nyue akho nni keryüi mvuso, a kethyüshvu dan genyu; a kaminyu ai akho ka ryümvu laso.

¹²A dushvula nyü kehü dan le a nsen pe bin laso, lo a nthyü nnyü shü kenyü nyule a nkela ti tse a ketsun; anyugun le a ntsun-o tharhi kethyü tsü kheshü mvu.

¹³Ale a-nyetin kerügü nyu hontse thakhwen nyülo mvu, kepin nyu hontse jozo lomvu.

¹⁴Ale temi mekhwen nyülo kemvu genyu me jo kenishü lo kemvu nyu nme hontse laso.

¹⁵Ai Npugü, ale ntenyen hünyo; O kedatsin Npugü, nle a kehi keni shüti.

¹⁶Ale kenjün thyü kelo genyu a shwikerüchün nyu no a sherhün bin nya; ale chekela genyu anyugun no ketekho bin nya!

¹⁷Ale che güjü la lo kenjün thyü bin gwünzin laso.

¹⁸Ale a kemu dan zoshwishü; a kemu genyu anyu nkhi sale.

¹⁹A shwikerüchün dan le aphu sherhün lo kvu; a-kon kendi ka a nrhi kehünyu kechon le bin nyo.

²⁰Kegwa thyüshü lo keshvu pe kethun kehü dan le a ntsun hünyo, ale tha kegwa thyü titse kehü genyu.

²¹O Npugü a kheshüla nya; a Sunggigü azen nithenla nya!

²²Ntsoka a keche shüta, O Npugü a kenikelo gü!