Read Southern Rengma Naga LÜHIN 39 Bible Online

LÜHIN 39 - Southern Rengma Naga bible

LÜHIN 39

¹Ale zo, “Ale nyuthyüy o tsünyu petsüo thyüti lo ayi no athyü pe mu loho temi gwakemvu nyu le akho ka kehü ka ale thame zo loho.”

²Ale jo konme-e zomvuo, matse bin, kegwa rülae zomvu! Ai a kenjün kethyü le shvukvu laso,

³lo anyunkhi sa lola. Ale rüchün chon lo kenjünthyü ketsintsin tse lola; ale ketsoshü mvutse sun bin lo hola:

⁴“Npugü, ano dithen ki yhun tila? Ano dinyü si tila? A keyhun le diche ka a-keni thyüla tiyo aka zoshü ta.”

⁵Nle akeyhun thyüpe dithen ki zü shüla! N mhundyü nyu akeyhun gwünkho le lihi kemvu. Ketsin temi ligü higü keyhun-e henthügwa nyeki thonmvu,

⁶thashe nme hontse. A-le thyü kehü tsü aphu a-kenrun nti; a-le kenya kequen hü, ai segü le tsülo ti yo shamvu.

⁷Npugü, tsonyatselo ale nyu nrin bin mon? Ale ntenyen hü nyo.

⁸A kemu aphu nyu a kenishü ta, lo thasha kemvu nyu no a shwi kenyü thyüla nya.

⁹Ale jokon nme-e zo loho, ale matse bin ti, nle ano hihontse kenjün thyü kebin genyu.

¹⁰Shaja pe atsüsin nya gwün! Nle avükeshünyu ale sigü jü laso.

¹¹Nle temi kemu genyu shaja pe tsüo a-rho shü, lo tsemünyu nme hontse a-kenyü gü tsü nkela hünyo. Ketsinthyü temi keyhun hile henthügwa hontse!

¹²Npugü, a kehi nyüshü ta, lo a kechü khwen nyü shülo; ale chü kebin ka ryü a kecheshü ta. A bonyu dan aphu hontse gwünkho keshanyu jaka ale nsin nyu hontse gwünzin.

¹³Ano shekerhün peha hyulo nrün genyu a nrhoshü ta ale tinlao ndila kemvu ka.