Read Southern Rengma Naga LÜHIN 40 Bible Online

LÜHIN 40 - Southern Rengma Naga bible

LÜHIN 40

¹Ale nyhenhio Npugü le keche keshü khwen bin; tson ntsin a-le akhwen shalo-o a kehi nyüshü.

²A-le tekhwünkü kenshvu gü nyu, lo sila lo kegwa dyünikhun gü nyu a süshwi shü. A-le akhipe tsonye nme ge shü lo ano kenshvu kendi nyu binlo.

³A-le a senthyü pe ano lükeshün nme thyülo, ngun Sunggigü keshwen lü nme. Hi kehyunyu kechon le nshvu lo njüo Npugü tenyenlo ti.

⁴Npugü tenyen-o rani teromen dan kigü kemvu nyu nmvue ketsinkemvu tero rüshvu kehünyu zen kerhün kemvunyu le henkegwa nyu.

⁵O Npugü agun Sunggigü, nle agun genyu thakechon thyüshü laso; nhontse kethyü nme ndi! Nle agun genyu tha ndun kethyü kechon rhishü. Ale tsüdan aphu zobu keloimvu tsü le chonri tsin!

⁶Dushvu pe kershvu lo thaho keshü dan nle lonyümvu; kershvubin ge nyukhu dan ro keshü nmvue kemu sen tinla nrün genyu kershvu dan nle hi bin mvu. Ai ano n khwenyü lo tse nle nyetin pe a tsüshü,

⁷tsügenyu ale nka, “Ale hika hü nle; nle agenyu senkethyü jodan tsü le tejvü lesü günyu thu njü.

⁸A Sunggigü, ale nkendo gü thyü nyü le! Ale n senkethyü jo pe anyun nyu shüpfü hünyo.”

⁹Npugü, n temi dan aphu kehun nyu, nle agun kenikeshü jolo kegwa gü ale zoshü. Ale tsüpe zomvu la kemvui tsekethyü nle shabin nyo.

¹⁰N kenikelo rüla tsü ale pe kebu lamvu; nle joketsin kezo lo keche kehü tsü ale a-zintse zo hünyo. N temi dan aphu kehun nyu ale matse lamvu le n joketsin kezo lo nle sozin kehü pe zo hünyo.

¹¹Npugü, nle ashwi njün kehü khela loho tse ale shabin nyo. N keso lo n joketsin kesen le a-zintse a ntsen bin ti.

¹²Kenjün kethyü kechon le a hunkenthün bin nyo tsüle swülo buho! A kemu dan le ajen lao, ale thahyu mvu laso; tsüle a pehü nyeki chonkvu laso, ale a kepeche ndi laso.

¹³Npugü, akenishü ta, ntsoka a cheshü ta!

¹⁴A dushvula ti tse nda kehü dan nyeki kvu shülo lao no kevükeben lata. Ale kenjün thyü kelo genyu a-sherhün kehü dan no keja pfülo njüo ranila ta.

¹⁵A shwinyü kehü dan no meno a-nyunye kvulao keja pfüla lo.

¹⁶N ki keryünyu aphu no a-kenyü lo a sherhün lo nda. Nle kenikelo genyu n cheno kehü nyu aphu no a-zintse, “Npugü le ditsükhi gon yono!” tson zolo nda.

¹⁷O Npugü, ale kvumvu lo tha ndile, ai nle a nmhin lamvu. Nle a kenikelo gü lo a Sunggigü a che whü shülo.