Read Southern Rengma Naga LÜHIN 41 Bible Online

LÜHIN 41 - Southern Rengma Naga bible

LÜHIN 41

¹Kendinyu phin rüchün kehü nyu le henkegwa nyu; anyugun le kenjün thyü kelo ka Npugü le anyugun cheshü ti.

²Npugü le anyugun khwenlo njüo anyugun keyhun ntsen shüti; a-le anyugun no kazü gü nyu anyu kenyü loti; a-le anyugun khepe shwikerüchün nyu kekvu hensin shüla loho.

³Anyugun le hanyü kebin ka Npugü le anyugun che ti. lo anyugun thyü kesherhün nishüti.

⁴Ale Npugü ka, “Ale nmhundyünyu mula sele; a shwi njün shüo a thyü ngwa shüta.”

⁵A shwikerüchün nyu le azo nshvu hünyo. Anyugun le ano silao a nmhin lanyü bin nyo.

⁶A shwikeryünyu le anyugun nyun ketsin thyümvu; anyugun le a rüla gwakemvu kequen lo njüo chwigü lika hika tsüzo hünyo.

⁷A kenrhinyu aphu nkhvü tse khinyunyu ka a rüla zobin hünyo, anyugun le ano shvukvu kela shwibin hünyo.

⁸Anyugun le, “A-le ha nsusa bin nyo; a-le thame kae a-jü nken nilo kemvui so.”

⁹A pvünyu kegwatsin, ale rüchün ngwa sa kehü gü, ahi a chvü kenjün tyü kehü gü le a ntsunlo laso.

¹⁰Npugü, a shwinjün-o a thyü kesherhün ni shüta, lo ale a shwikerüchün nyu dan pu kethun nishü ti.

¹¹Anyugun le anyekvu loho, lo ale nle ashwi nkenyü hü tse kethyü shalo ti.

¹²Ale nyu le njüyo tsüthyü kehü genyu, nle ache shüti; Nle kehü bin nyu ano kethonthen bin hüti.

¹³Npugü shwen, Israel Sunggigü! Ntsokae lo kethonthen a-shwen Amen! Amen!