Read Southern Rengma Naga LÜHIN 42 Bible Online

LÜHIN 42 - Southern Rengma Naga bible

LÜHIN 42

¹Thyüzhe le rinyu zü kekun nnyü kehü hontse, ale nnyü hü nle, O Sunggigü.

²Rhünkehü Sunggigü, ale nnyü ritsin bin nle; dicheka ale gü n mhundyü nyu n rüshvu logwa tila?

³Tsangben tsangzün ale chü, a yhüphu che pe a chvü thyü laso; gwünko aphu ka a shwikerüchün nyu le, “N Sunggigü le diki hü nla?” tse ketson hü nyo.

⁴Ale gükela gwünkho rüchünlo lo anyun kenjün thyü rile, ale temi danda zen Npugü kaki gun kejü ka ale ri lo anyugun le athen-o, shekerhün thyü lüthyü lo nrasen-o Sunggigü shwen hü.

⁵Nyuthyüo ale anyun gwamvu sabin tila? Nyuthyü-o ale kenjün thyü sabin tila? Ale a kenrin pe Sunggigü ge shüti. lo gwüngwa me ale a kenikelo gü lo a Sunggigü shwenti.

⁶Hiki me rünyi ki anyun boren boryü, lo a kerüchün rani a-ki gü. A-le nyun gwakemvu zükentyü nipe a kapu so shü; Hermon lo Mizar kazüthun kipon kenshvu kenrin le zükeda lo züshwashwa hontse jordan ki tsüryü.

⁸Npugü no nhenyu gwünkho ka a-le sozin kehü tsü teshashü nda, tson-o ano khejenyu lü no bin lo nda, a keyhun ronzin khikeshü Sunggigü ka kehi kethyü.

⁹Ale a tsonye gü, Sunggigü ka, “Nle nyuthyüo a nmhin la ola? tsonzo. Nyuthyüo ano a shwikerüchün nyu rigwa kemvu nyu kenjün thyü mvulo shvula la?”

¹⁰Anyugun le a kenshwen le a boren laso, anyugun le, “N Sunggigü le diki hü nla?” tse shün bin gwünzin.

¹¹Nyuthyüo ale anyun gwa mvu sa bin tila? Nyuthyüo ale kenjün thyü sa bin tila? Ale a kenrin pe Sunggigü ge shüti, lo gwüngwa me ale a kenikelo gü a Sunggigü shwen niti.