Read Southern Rengma Naga LÜHIN 44 Bible Online

LÜHIN 44 - Southern Rengma Naga bible

LÜHIN 44

¹O Sunggigü, agun le agun nyetin pe tsünyülo-- lo agun bonyu dan le nduka jon kethon gü kelaki nle anyugun gwünkho ka tha kedada thyü keshü rüla agun ka zoshü:

²nle nnpvü tenyen kemvu tsipwen dan hüla lo nle n temi dan no anyugun kazü günyu yhun sola; lo nle shaja pe tsipwen kecha dan tsüla njüo n npvü n temi dan no gwakenye soryülo.

³N temi dan le anyugun zhethon sen kazü gü lo lomvu; anyugun npvü anyu kekvu ka me nyekvu lomvu; ai nle anyugun zen hüti tse keshü, nkekvu lo n kenko genyu le, tsüle nle anyugun sokehü tsin shü.

⁴Nle a raja lo a Sunggigü le; nle kvukelo khipe n temi tsüshü,

⁵lo n kekvu nyu agun le shwikerüchün nyu nyeki kvulo.

⁶Ale a levü nmvue a zhethon le a kenilo ti tse tenyen mvu;

⁷ai nle a gun shwikerüchün nyu ben nyu agun kenishü, lo agun kenrhinyu nye kvulo la.

⁸Agun le n shwenzin hüti lo kethonthen chenkeno pe ntsüti.

⁹Ai nle ntsoka we agun khelao agun no kvulomvu laso; nle agun rihü dan zen-o tsonchü chwi sin mvu laso.

¹⁰Nle agun no agun shwikerüchün nyu mhundyü tin, lo agun hon dan anyugun no khilo la.

¹¹Nle agun no tanyü hontse meno agun dushvu; nle agun no sin rünyi ki nren nru laso.

¹²Nle n npvü n temi pe a-min kene ka jwela anyu gun pe a-min kendi hontse kela genyu

¹³Nle agun ge nyuthyü shüyo agun kazon nyu dan le hyu bin nyo, lo anyugun le agun zo pe keyü thyüo agun shwinyü.

¹⁴Nle agun no tsipwen dan nyu meno zo pe keyü kethyü nme thyü laso; anyugun le a-nyu pe kegün pe agun hi.

¹⁵Ale a-zintse kemeni; lo keja pfü

¹⁶a shwikerüchün nyu lo a ntsü kehünyu le a kemenio a nshwen.

¹⁷Agun le n nmhinla nmvue nle agun zen kejozenkelo gü borhola mvu ai tha hidan hi aphu agun ge ryü.

¹⁸A gun le n kipon a gun nyun ranila mvu; n johokeshü dan thyüzen mvula mvu.

¹⁹Tson-e nle agun khipe tehenthyü dan nyu gwün keshvu thyü; nle agun hope kezün kentsun nyu shü laso.

²⁰Keshanyulaka agun le agun Sunggigü rüshvu mvulao terokecha nme ka kehi thyü tin kela we,

²¹nle tsü shalo la tsentsü, nle kekebu ki agun kerüchün dan sha kebin genyu.

²²Ai ngenyu meno gwünkho aphu ka agun dushvu, dushvula ti tse kebin tanyü hontse meno agun ge thyü hü.

²³Npugü, chonsoryülo! Nle nyuthyüo jübin nla? Soryüta! Kethonthen agun khe nyalo!

²⁴Nle nyuthyüo agun kebu bin nla? Agun kenjün kethyü lo gwünkeshvu nmhin nyalo.

²⁵Agun boren pe kazünyu che laso; mele agun nyekvu lao agun le kenphü nyu keto bin nyo.

²⁶Ryü agun che shülo! Nle sozin kehü genyu agun kenishülo.