Read Southern Rengma Naga LÜHIN 45 Bible Online

LÜHIN 45 - Southern Rengma Naga bible

LÜHIN 45

¹Jo kezegwa dan le a nyun sü bin nyo, ale raja gü ge lü higü ron kebin hontse. Lesü thu kegwa nyu kethui nme hontse ayi le lühin titse nda bin nyo.

²Nle temi dan nyu kezegwa tsin gü; nle jozo tsüchvü kehü nme. A-zintse Sunggigü le jochü pe ntsü hü.

³N zhethon khipfülo, raja kekvu gü; nle zoshwen zonye lo terün pfü.

⁴Ketsin lo kenjü nopen titse nle terün kepfü nyu ge bin-o kvukelo nyu gun! N kenko genyu nno kvusa loti!

⁵N levutsi dan le ara ntsen, tsüle n shwikerüchün dan nyun jenkho lati; tsipwen dan le n pha ka che ti.

⁶Sunggigü le khipe n ketsü rajaphen tsüle kethonthen bin ti. Nle kenjü sen-o n temi dan sa gon ti;

⁷nle nyu le njüyo tsüle n kenyü lo nyu le gwamvu yo tsü ntsü. Tsügenyu Sunggigü, n Sunggigü le n kejü lo lo raja kecha aphu nyeki nyun kenyü run chon kvu pe n ge shü.

⁸N phinya ge myrrh lo aloes rün kegwa le bin; chunhü lope nthyü nzen kethyü keda ka nyu lükethyü nyu le n nsin hü.

⁹N raja kanyu teshwe kepfü tenunyu dan nyu rajanyu nyugi dan le hü, lo n rajakhün njüzin raja gi le so bin hü, suna kenshün tsin ronye dan sen-o.

¹⁰Shenhügi, a jo nyüshü ta n npvü n temi lo n pvü ka nmhinla lo.

¹¹N kezegwa le raja gü thyü pe n tepen loti; a-le n npugü, tsügenyu nle kejo zen mvulo shvu.

¹²Tur temi dan le jwe senryü n tsü ti; kenya nyu dan le nso pfülo titse fü ti.

¹³Raja kanyu kebin raja nyugi le ditsüki zegwa la! A-phinya le suna ninpe da.

¹⁴A-phinya ajvükezü bennya kehü a-zen raja kigü, a-nizingi dan le a-sithen hü, lo anyugun ai zen a-ki ryü.

¹⁵Anyugun le shekerhün lo nyun kenyü thyü ryüo raja kanyu yü.

¹⁶Nle a raja, nle nnyu peche kechon hyulo ti n pvübon nyu dan sunka raja thyü nrün genyu, lo nle anyugun pe kazü aphu so kekvu kesen nyu thyü ti.

¹⁷A lü le n zankechwi no kethonthen rhün kehü thyüti, lo ryükezhü gwünkho kie temi aphu n shwen hü ti.