Read Southern Rengma Naga LÜHIN 49 Bible Online

LÜHIN 49 - Southern Rengma Naga bible

LÜHIN 49

¹Hi nyülo lo, lihigüe! Nyülo. lika hika kehü temi aphu,

²keda güe lo keshe güe, n nya metse lo ndi metse.

³A kerüchün le ntsun ti; ale thakeshajo zoti.

⁴Ale a nyetin kerü pe thakesha jodan nyü ti lo ale lükhin sen lüthyü kebin hontse tsüdan kon zoshüti.

⁵Shwikerüchün nyu le a hunpfülo la yatse-e kenshvu ndi,

⁶temi gwakemvu a-npvü a-kenya tenyen kehü a-kenya kechon le kebin genyu ketekho kehünyu.

⁷Temi nme le thame kae a-npfü a-rhinhi lo nrün ndi; a-le a-keyhun min thyüpe Sunggigü tsü keloi mvu,

⁸Kechamvule temi nme keyhun min le tsenri tsin kethyü genyu. A-le thame a-min thyü pen keloi mvu

⁹a-no sika nyu yü mvuo, kethonthen yhun loti tse kethyü.

¹⁰Thakeshanyue sila hü tse kethyü temi lihigüe hyulo gwa, kephonyu lo kengo nyue tsü hontse. Anyugun aphu anyu kenya khepe anyugun tsipwen tsü la hünyo.

¹¹Anyugun sika tsüle kethonthen anyugun ka; Anyugun le gwünkho aphu ka tsünyu bin hünyo, gwüngwa nme ka anyu gun le anyu kazü le bin hüe.

¹²Temi nme keda le a-no simvulo nrün genyu a-ntsen lo hümvu; a-le nyukhu dan hontse sila ti.

¹³A npvü a-tenyen kehü nyu le dihontse la hüyo shwishü,

¹⁴tanyü hontse anyugun le sio nkela ti, lo kesi le anyugun kekhwen thyüti. Kemitsin nyu le anyugun nyekvu loti; anyugun kezün nithen ki kesinyu kazü günyu anyugun min le ren whü kela hontse!

¹⁵Ai Npugü le arhinhi loti; a-le kesi kekvu günyu a kenilo ti.

¹⁶Temi nme le nnya soryü la, a-kenya le tsünyeki chon kenye chwiryü kela ka rünyu mvu nya;

¹⁷a-le sila yatselo a-le tsü khilo ho; a-kenya le a-zen-o sika nyu gü lo nrün ndi.

¹⁸Temi nme le keyhun higü ka yhun pe a-kenyü bin yatse-e lo a-le gwakelo genyu mele a-shwe bin yatse ai,

¹⁹a-le kesinyu a-pvübon nyu dan aphu zen kengü nme thyü tin lati, kezün le kethonthen binzin kehü bin ki.

²⁰Temi nme keda le a-no sika nyu gümvu lo nrün genyu a-ntsenlo hümvu; a-le nyukhu dan hontse sila ti.