Read Southern Rengma Naga LÜHIN 5 Bible Online

LÜHIN 5 - Southern Rengma Naga bible

LÜHIN 5

¹O! Npugü, a-jo nyü shülo, a thakerüchün dan rüchün shülo.

²A kehi khwen nyü shüta, a Rajagü lo a Sunggigü; ale nka hi kebin genyu.

³O! Npugü nle lonyü a khwen nyülo ti; lo lonyü ale nka kehi thyüo n nrin binti.

⁴Nle serikemvu le n kenyü kehü Sunggigü kemvu; nmvu-e gwakemvu le nzen binlo nrün ndi.

⁵Ketekho nyu le nmhundyü nyu sunbin loho; nle serikemvu tho thyü kehünyu shwi ntsü hünyo.

⁶Nle kenkunyu dan nkela hünyo: Npugü le me dukeshvunyu lo me sakehü nyu shwi ntsü hünyo.

⁷Ai awe n keso shwi kenjün chonkeri nyu, ale n kanyu ryüti; tson-o n kenshvu nyu n kenshün Kershvuka nyu n rüshvulo gwa.

⁸O! Npugü, a shwikerüchün nyule chonri kethyü genyu, atson tsinpe nkenda nyu shülolo; a mhundyü nyu n tson gü thyü kenjü shüta.

⁹Kechamvule anyugun mün nyu tenyenlo kekü nme ndi; a-nyu nyun le serimvu ritsin; anyugun rühon le sika kepe kü nme hontse ayi pe mesa hünyo.

¹⁰O! Sunggigü, nle anyugun nkela lo; anyugun no anyugun npvü teda rhi kelonyu chela lo; anyugun le gwünzü kela dan genyu n mhundyü nyu anyugun hü lalo; anyugun le n ntsun kethyü genyu.

¹¹Ai n ketenyu nyu we no a-kenyü külo, nle anyugun sunkelo genyu anyugun no anyu kenyüo nra senlo; n zan so kehü dan kono nge a-kenyü lolo.

¹²Kechamvule Npugü, nle jochü pe kemitsin gü tsüti; n keso le gida hontse a-hunpfü lo lati.