Read Southern Rengma Naga LÜHIN 50 Bible Online

LÜHIN 50 - Southern Rengma Naga bible

LÜHIN 50

¹Kekvutsin Sunggigü, Npugü le npho ka gun gü nkhün keti kazü aphu ko hünyo.

²Sunggigü le Zion nyida, zegwa pen kethyü günyu ben bin nyo.

³Ngun Sunggigü le ryüzhü, a-le matse loho; rola kehü mah nme le a-mhundyü hü, lo tsangkenbu terhi le a-hunpfü hü.

⁴A-le a-temi dan jünkera kethyü tsang lo kazü no shwishü lotse koshü.

⁵A-le zo, “kershvu thyü pe aki shüo azen kejozen kenjün temi ketsin dan fü kequen pe aki shülo.”

⁶Tsang le Sunggigü le kemitsin lo a-le a npvü mejün kekera gü tse zoshü.

⁷“Nyülo, a temi dan, ale zo shüti; Israel, ale nge a kenyü kemvu zoshüti. Ale Sunggigü, hagun Sungigü le.

⁸Nle a-zintse rora lo tha rope kerüshvu sen aki ryü hü nyo tsügenyu ale nrhomvu.

⁹Tson-e a-le nthu dan nyu methutse nmvue n nyü dan nyu tenyütse lomvue gwa;

¹⁰chün nyu kehü nyukhu dan lo rincho ge kehü senru yie yie tsü aphu a hon.

¹¹Tehenyu kehü tegü lo low nyu kehü yhun kebin dan tsü aphu ahon.

¹²“Ale nnyo yatse-e, nka zo loho, kechamvule kazü gü lo tsünyu kebin nmeme aphu ahon genyu.

¹³Ale methutse thyü tyü nmvue tenyü zi tsü hü ole?

¹⁴Chenkeno rora thyü pe Sunggigü ki shülo, lo nle zoshwi shü kenjü aphu khipe kekvutsin gü tsülo.

¹⁵Kenjün kethyü le keryü ka akoshü lo; lo ale n kenishü ti, tson-o nle a shwenti.”

¹⁶Ai Sunggigü le serikemvunyu dan ka, “Hagun le ale johokeshü dan tsü zonini pe nyuthyü mon? Azen kejozenkelo tsü kera pe nyu thyü mon?

¹⁷Nle ale n kemu tsin pe n kehi tsü lomvu; nle a johokeshü dan tsü kenila.

¹⁸Nle kerühvu nyu lihigü zen kepvüshe, lo keyüla nyue zen kengü hü.

¹⁹“Nle a-zintse tha gwakemvu zo titse nda hü; lo kenku jokezo n ketekhi hümvu.

²⁰Nle n tsasikezen nyu nmu lo anyugun kemu fülo titse nda bin hü nyo.

²¹Nle tha hidan aphu thyü hüe thame zomvu, tsügenyu n kerüchün le ale n hontse ado tse hü. Ai ntsoka ale nrho lo akon zope n hiti.

²²“Hi nyülo, hagun ajozenmvu kela dan, nmvu yatselo ale hagun nkela ti, lo temi nme-e hagun kenikeshü ndi lati.

²³Chenkeno khishü kehü rora tsüle a rühvu hünyo, lo ale ajozen kehünyu aphu kenishü tsentsüti.”