Read Southern Rengma Naga LÜHIN 51 Bible Online

LÜHIN 51 - Southern Rengma Naga bible

LÜHIN 51

¹O Sunggigü, a shwinjün shüta, nle sozin kehü genyu. N shwikenjün keda genyu akemu dan shon lata!

²A gwakemvu aphu süla lo lo akemu nyu athyü kenshün shüta!

³Ale thyüzü kela dan shalo laso; azintse akemu dantsü rüchün bin hünyo.

⁴Ale n ntsun-o mu laso, n kentsun thyüla lo nle gwamvu le tse rüchün kehü tsü thyü laso. Tsügenyu nle a jünkera kebin tsüle a-zü; nle a nmu kela tsüle njü le.

⁵Kemunyu a phupfü lo; lo a nnyu kelo kanyu ale gwamvu hü.

⁶Nyun ketsin lo ketsin tsü nle lonyü; n thakesha pe anyun kesü thyü shüta.

⁷A kemu khila lo, tsonlo ale nshün loti; a süla ta, tson yatselo ale khütso nye chon lati.

⁸A no shekerhün lo nyunkenyü khwen nyülo ta; nle a boren lo bosere la yatse-e, ale a kenyü gwanilo ti.

⁹A kemu nri nya, lo a gwakemvu aphu shonla ta.

¹⁰O Sunggigü, nyunkenshün pe anyunnyu shüta, lo njokezen kapu keshün pe age shüta.

¹¹N mhundyü nyu a hü pe shwenla nyata; lo age n kenshün kapu gü sen tinla nyalo.

¹²N kanyu chwikeryü kenikelo shekerhün gü tsü pe atsü nishülo, lo a thyü pe a no n jozen nyüho lolo.

¹³Tsonya tselo ale n johekeshü pe kemu nyu senthyü shü ti; lo anyugun le nki rani ryüti.

¹⁴O Sunggigü a keyhun nrho shüta, lo a kenishü ta, lo ale anyun kenyü thyü n kemitsin rüla pe zo ti.

¹⁵Npugü, a keche pe ano n shwen ta.

¹⁶Nle rora dan le n kenyü mvu, kemvu we ale tsü thyü pe n tsüti ata le; nle tha rope n kerüshvu le n kenyü mvu.

¹⁷O Sunggigü, anyun ketsenyo hile rora thyü pe ntsü kebin güle; nle a-nyun ketsenyo lo anyun kelu kelo nyun kenila loho.

¹⁸O Sunggigü, Zion njünlo a-keche shüta; Jerusalem chwida kehun thyüni shülo.

¹⁹Tson yatselo nle agun le a-kezü nyu rüshvu keshü lo rope kerüshvu dan shwi n kenyü loti; lo n kershvubin ge methutse pe rüshvu shüti.