Read Southern Rengma Naga LÜHIN 55 Bible Online

LÜHIN 55 - Southern Rengma Naga bible

LÜHIN 55

¹O Sunggigü, akehinyü shüta; ale a shwikenjün hi kethyü ka rani tinla nyalo!

²A khwenyü shüo a kehi kenishü ta; ale a nyun kenjün thyü pe a hokeli laso.

³Shwikerüchün nyu le akedün kebin a kerüshvu laso, serikemvunyu dan le a nshwen-o a boren laso. Anyugun le kenjün kethyü senryü a ge shü, anyugun le a ge a-nyu nyunnta lo a nrhi.

⁴Ale a kerüshvu laso, kesi kenshvu le a boren laso.

⁵Kenshvu lo ke kensü le a ge ryü laso; kenshvu kenrin le a nyeki kvulo laso.

⁶Ale nsu hontse asekin le bin yatse kethyü we, ale nye tin güo kebwen fülo ti.

⁷Ale nithen ki nye tin gü tehen yhunkemvu bin ki yhun ti.

⁸Ale nmheo tsangkenbu terhi ka a npvü tesun kelo bin nme fülo ti ata le.

⁹O Npugü, a shwikerüchün dan no kejo rhünmvu lalo! Ale nyida gü nyu kega kethyü lo kenyo kenyü kebin hyu,

¹⁰tejvü gwünkerho lo kenjün kethyü le tsü süo, nhenyu lo khejenyue tsü hunpfü bin.

¹¹Tsünyu kenke le lihikae bin; tsonda aphu nyu kenshwen kenyhün lo kesa kesü le bin.

¹²Tsüle a shwikerüchün nyu le a shwinyü bin yatse kethyü we, ale tsü nyhen lo gwa; lo tsüle a kentsun nyu le ketekho pe a hi binya tse kethyü we ale a-kebu tin la logwa.

¹³Ai azen kengü kehü, azen bin meka bin kehü, a pvünyu akho keni gü tsüle nle le.

¹⁴N nyi le kenthon ketegvü kehü nyu lo Kershvuka gü nyu kengüo rüshvu hü.

¹⁵A shwikerüchün dan no anyu gwünkho pen kemvu ka sila lo; anyugun no anyugun kerhün tenyen tse kesi kazü günyu yüla lo. Gwakemvu le anyugun kanyu lo anyugun nyun nyu kebin genyu.

¹⁶Ai ale Npugü Sunggigü no cheshülo tse koti, lo a-le a kenilo ti.

¹⁷Lonyü, nhennyu lo kheje kie ale kenya kethyü lo anyun kenjün kethyü a-ka zo ti, lo a-le a kenilo ti.

¹⁸Ale a shwikerüchün nyu kechon zen-o terikethyü nyu a-le akeni zen-o rani ryüti.

¹⁹Sunggigü, kethonthen keda thyü kehü güle, akhwen nyüo anyugun nye kvulo ti; anyugun le kelu nyümvu lo a-nshvu mvu kela genyu.

²⁰Nduka azen kengü kehü güle a-pvünyu ju nrenla; a-le a-jo dan borho la.

²¹A-jole terzü nyeki bwen, ai a-nyun nyu we me shwirüchün; a-jo le terzü pe yün kenjü hontse, ai zhethon yi kegwa hontse me gvü hü.

²²N kenjün kethyü keli pe Npugü tsüla lo, lo a-le n nopen loti; a-le thame kae meno joketsin kezo nyu nyeki kvula loho.

²³O Sunggigü, nle me dukeshvunyu lo kenku nyu dan tsü a-nyugun keyhun ponha le gü kelo mhundyü zen gü anyugun sika nyu shü lati. Ai a wele, n tenyen hüti.