Read Southern Rengma Naga LÜHIN 59 Bible Online

LÜHIN 59 - Southern Rengma Naga bible

LÜHIN 59

¹O Sunggigü, a shwikerüchün nyu ben nyu a kenishü ta; a when kebin nyu ben nyu a ntsen lolo!

²Temi serikemvu tsüdan ben nyu a kenishü; me dukeshvunyu tsüdan ben nyu a ntsen lo!

³Shwishü ta! Anyugun le a dushvula ti tse khwen bin nyo; temi a-rigwa kemvu nyu le kequen lo-o a ntsun bin nyo. Tsüle kemu nme genyu nmvue ale thyüzü kela genyu mvu.

⁴nmvue a thyükezü nme genyu anyugun le tin-o anyugun bin ki güla mvule, O Npugü.

⁵Npugü Sunggigü, kekvutsin gü, Israel Sunggigü soryü nri shüo a keche shüta! Soryüo tenyen kemvu dan shaja pe tsülo; thagwakemvu rhi kehü dan shwikenjün pe hi nyalo!

⁶Anyugun le ngwünki nyida günyu niryüo, tehi hontse mvü-o hohü nyo.

⁷Anyugun le me kenshwen lo me kedün kethyü tsü nyüshü ta. Anyugun mün nyu anyugun yi le zhethon hontse, ai anyugun le temi nme-e anyugun khwentse mvu le tse rüchün hünyo.

⁸Ai Npugü, nle anyugun shwinyü lahü; nle tenyen kemvunyu aphu shwi ndyü ngwa la hünyo.

⁹Ale n kenko tenyen tsentsü bin nyo; O Sunggigü, nle a kesun güle.

¹⁰A Sunggigü le a sohü lo a-le aki ryüti; a-le ano a shwikerüchün nyu le kvulo mvu kela hyuti.

¹¹O Sunggigü, anyugun dushvula nya, a temi dan le nmhinla lo keshvu genyu. N kenkonyu anyugun hü kezen lao anyugun no kvulomvu la, O Npugü, agun keno gü.

¹²Kemu le anyugun mün nyu bin; anyugun jodan aphu kemu; anyugun ketekhonyu anyugun tenlo la nda! Anyugun le me swetsü lo nku kehü genyu,

¹³n nyunkenta nyu anyugun nkela ta; nkeshü lalo. Tson yatselo temi nme me aphu Sunggigü le Israel nyu keda thyübin, lo a-keda le kazü aphu sogon bin tse kethyü sha loti.

¹⁴A shwikerüchün dan le ngwünki chwiryü tehi hontse mvü-o nyida günyu hohü,

¹⁵tehi le a-chvü füo a-gin nyülo mvulo me kesü kehü hontse.

¹⁶Ai a we nkenko zo-o lüthyüti; lonyütsen nle sozin kehü lüthyü tetso shüti. Nle a nokhin, lo ale thyülo keshvu gwünkho ka a kesun thyü ryü.

¹⁷Ale nshwen hüti, a keno gü. Sunggigü le, a kesun gü. Sunggigü le, a so kehü gü.