Read Southern Rengma Naga LÜHIN 60 Bible Online

LÜHIN 60 - Southern Rengma Naga bible

LÜHIN 60

¹O Sunggigü, nle agun keni laso lo agun nye kvulo laso; nle agun ge nnyunta ryü laso, ai ntsoka we agun ki rani ryüta.

²Nle kazü gü thyü pe no a-ke nsü, lo nle tsü dukho laso; tsüle che güjü kela genyu, ntsoka tsü thyü ngwa shüta.

³nle n temi thyü pe no kenjün thyü sa laso; agun le zu tsü nzeü kela hontse kezekego gwünzin laso.

⁴Nle senyu le nrühvu hüyo tsünyu no petsü lolo tse shüta, anyugun no kenke gü tsü nrhilo nrün genyu.

⁵Agun kehinyüo, n kekvu gü nyu agun kenishü ta; nle sokehü temi dan kenilo nrün genyu.

⁶Sunggigü le a-Kershvuka nyu zoshü, “Kvukelo sen-o ale Shekem kenjün lati lo Sukkoth kazü ketejon kenjün pe a temi tsü lati.

⁷Gilead lo Manasseh ko ahon; Efraim le aperün lo Juda le a raja thün le.

⁸Ai ale Moab pe a ben ketsekhun hontse sen ti, lo ale aphakü shwepe Edom ge shüti; tsüle a hontse kethyü zansü. Filistian nyu le anyeki kvu lo-o nra sen ti tse rüchün hü le?”

⁹O Sunggigü, següle, aten sen gü chwida khwen pe hun kenjü nyida günyu shü mon? Següle azen-o Edom ki gü mon?

¹⁰Nle agun khe tsin thyüla se ole? nle agun rihüdan zen tsonchü chwimvu ti ole?

¹¹Agun cheo shwikerüchün gü ntsun shüta; temi kekeche we kenrun le.

¹²Sunggigü le ngun denzin hü yatselo ngun le kvulo ti; a-le ngun shwikerüchün dan nyeki kvu lati.