Read Southern Rengma Naga LÜHIN 66 Bible Online

LÜHIN 66 - Southern Rengma Naga bible

LÜHIN 66

¹Temi aphu, shekerhün thyü nrasen-o Sunggigü shwenlo!

²A-zankechwi lüthyü lo; zankechwi keshwen khipe a-tsülo!

³Sunggigü ka zolo, “N tho dan le ditsüki ndun thyüla! tson zoshülo. N kekvu le gon ritsin n shwikerüchün nyu dan le n nshvuo nmhundyü nyu nkhüntsü lati.

⁴Kazü so kehü lihigü n rüshvu ti; anyugun le lü thyü n shwen ti, anyugun le lüthyü n zan shwen ti.”

⁵Ryüo Sunggigü le nyu thyüshüyo, temi dan nyu a-tho ndun kethyü ju shwishü lo.

⁶A-le zida thyü kelu pe kazü kesin thyü lao; ngun pvübon nyule tsonchüo pfüthü chwila. Tsüka a-le thyü keshü tho genyu ngun le shekerhün thyülo.

⁷A-le kekvu sen-o kethonthen keda thyü bin nyo lo a-yhütyü le tsipwen dan nri bin hü. Jozen kemvu nme soryü a-ntsun nya.

⁸N gun Sunggigü shwenlo, tsipwen aphu; a-keshwen khwen meno nyülo.

⁹A-le ngun no chela mvuo ngun ntsen pe ngun no rhün bin nyo.

¹⁰Sunggigü, nle agun kegwa keshvu shwi; mah pe rakagi thyü nshün la kehü hontse nle agun kegwakeshvu shwi laso.

¹¹Nle agun no me sen ka minla, lo khvu kensu pe agun ge shü.

¹²Nle agun shwikerüchün nyu no agun kedü la; tson-o agun no mah lo zü nyue yü, ai ntsoka we nle agun zenryü kenshvu kendi bin nme nyu shü laso.

¹³Ale rope kerüshvu dan sen n kanyu ryüti; ale nyu zoshü njü yo ale tsüpe n rüshvu ti.

¹⁴Ale kenjün thyü kebin ka, zoshü kenjü ale tsü pe n tsüti.

¹⁵Ale kershvubin gü ge tanyü rope n rüshvu ti; ale methutse lo tenyü dan pe n rüshvuo, mah kekhu no tsangge küti.

¹⁶Sunggigü rühvu kehünyu aphu, ryüo nyüshülo, lo a-le agenyu nyu thyüshüyo ale pe hagun ka zoshü tile.

¹⁷Ale nra-o a-ka keche hi; lo ale lüthyü pe a-shwen shü.

¹⁸Ale akemu dan shalo mvu yatse kethyü we, Npugü le a-khwenyü shü mvula nrün.

¹⁹Ai Sunggigü le a khwen nyü shüla ketsin; a-le a kehi nyü shü.

²⁰Ale Sunggigü shwen le, a-le akehi kenila mvu nmvue akipon a-le sozin kehü gütsü khilo la kemvu genyu.